„პროკურატურა უმეტესად იმ ფორმატში საქმიანობს, რაც წინა ხელისუფლებისგან მიიღო მემკვიდრეობით“, - ამის შესახებ ყოფილმა მთავარმა პროკურორმა არჩილ კბილაშვილმა ტელეკომპანია "მაესტროსთან" საუბარში განაცხადა.

მისი თქმით, ის კარგად იცნობს პროკურატურაში არსებულ ხარვეზებს და მის მიერ შექმნილი ორგანიზაცია ამ ხარვეზების აღმოფხვას ემსახურება.

„კარგად ვიცი რა ხარვეზებს შეიცავს არსებული სისტემა. ამიტომ საუბარია ამ ხარვეზების აღმოფხვრაზე და კონცეფციის შემუშავებაზე. პროექტს აქვს ორი განშტოება. ეს არის პროკურატურის რეფორმის ხელშეწყობა. ასევე მისი პროფესიონალიზმისა და დამოუკიდებლობის ზრდა. მეორე არის აღმკვეთი ღონისძიების სრულყოფა. იმედი გვაქვს, რომ იმ კონცეფციით, რომელზეც დავიწყეთ მუშაობა, წლის ბოლოსთვის მივიღებთ მკაფიო სურათს, რომელიც შესაძლებლობას მოგვცემს გავსაზღვროთ, როგორ უნდა იყოს მოწყობილი ეს ორგანიზაცია", - განაცხადა არჩილ კბილაშვილმა.

რაც შეეხება ყოფილი მაღალჩინოსნების დაკავებას, კბილაშვილმა განაცხადა: "როცა მთავარი პროკურორის პოზიცია მეკავა, ჩემი ამოცანა იყო ის, რომ მაღალჩინოსნებთან დაკავშირებით მიმდინარე ქმედებები ყოფილიყო ზედმიწევნით გამჭირვალე და ყველა მტკიცებულება ყოფილიყო საზოგადოებისთვის ხელმისაწვდომი. ვფიქრობ, ამ კუთხით გამჭვირვალობა უნდა იყოს შენარჩუნებული", - განაცხადა კბილაშვილმა.