პრეზიდენტი უსაფუძვლოს უწოდებს ბიძინა ივანიშვილის მხრიდან მისი მისამართით გამოთქმულ ეჭვებს, თითქოს ის ის "ნაციონალურ მოძრაობას" ეკეკლუცება. როგორც ტელეკომპანია „იმედის“ გადაცემა „რეაქციაში“ სტუმრობისას განაცხადა, 9 წლის განმავლობაში პრინციპულად არ მოსწონდა, რასაც ეს ძალა აკეთებდა და ამის შესახებ ყოველთვის ხმამაღლა ამბობდა.

"2003 წლიდან დაწყებული, როდესაც ზურაბ ჟვანიას გუნდში ვიყავი, შემჩნეული ვარ იმაში, რომ ამ 9 წლის განმავლობაში ან პოზიცია არ დამიფიქსირებია, ან ბიზნესი მიკეთებია მათთან ერთად, ან მიფინანსებია ეს გუნდი, ან ვყოფილვარ თანამდებობაზე „ნაციონალური მოძრაობის“ დროს?! პრინციპულად არ მომწონდა ის, რასაც აკეთებდა „ნაციონალური მოძრაობა“. 9 წელი ყველა იმ ალიანსში ვიყავი, ვინც ამ გუნდს უპირისპირდებოდა. მე არ ვიცი დღევანდელ პოლიტიკურ ელიტაში თუ არის ვინმე ჩემზე მეტად „ნაციონალურ მოძრაობასთან“ დაპირისპირებული ბიოგრაფიის მქონე ადამიანი, ის ვინც სააკაშვილის წინააღმდეგ იყო 2003 წლიდან“, - განაცხადა მარგველაშვილმა.