საქართველოს პრეზიდენტი მასსა და მთავრობას შორის არსებული „უსიამოვნო ფონის“ მიუხედავად ოპოზიციაში წასვლას გამორიცხავს.

ამის შესახებ გიორგი მარგველაშვილმა ტელეკომპანია „იმედის“ გადაცემა „რეაქცია“-ში სტუმრობისას განაცხადა.

„მე ვარ საქრათველოს პრეზიდენტი და არ ვარ არცერთი პოლიტიკური პარტიის ლიდერი. ვისთან უნდა წავიდე ოპოზიციაში? ერთადერთი, ვისთანაც შეიძლება ოპოზიციაში ვიყო - ეს არის ჩემი სამშობლო და რატომ უნდა დავდგე საქართველოს ოპოზიციაში? ვის უნდა დაუპირისპირდე? მაინტერესებს, რას ნიშნავს პრეზიდენტის ოპოზიციაში წასვლა? საქართველოს პრეზიდენტი უკვე არის მოვლენების ლიდერი. რას უნდა მივაღწიო ოპოზიციაში რომ წავიდე, ვინ უნდა გავხდე? თქვენ გგონიათ, რომ თუნდაც ამ უსიამოვნო ფონიდან გამომდინარე, გამომდინარე იქიდან, რომ ჩემზე ჭორაობის სეზონი გაიხსნა, მე შეიძლება გადავდგა ემოციური ნაბიჯი და დავუპირისპირდე არა „ქართულ ოცნებას“, არამედ ჩემი ქვეყნის ხელისუფლებას, რომლის ვალდებულებაა აქ ყვეყნის წინ წაწევა?! პირიქით ჩემი ფუნქციაა ხელისუფლების, სასამართლოს და პარლამენტის გაძლიერება. მე სცენარიც კი ვერ წარმომიდგენია, რომ გადავიდე ოპოზიციაში, გარდა იმისა, რომ მე შეიძლება გავღიზიანდე ამ ვითარებაზე და ამ ყველაფერს ემოციური რეაქცია მივცე, რაც საბოლოო ჯამში მეც დამაზიანებს და - ვითარებასაც“, - განაცხადა მარგველაშვილმა.