ექსპერტ სერგი კაპანაძის განცხადებით აშშ-ს სენატის მიერ მიღებული კანონპროექტის ყველაზე მნიშვნელოვანი ასპექტი არის ის, რომ რუსეთის მიმართ სანქციების დაწესება, დაუკავშირდა მის მეზობელ ქვეყნებში არსებულ მდგომარეობას.

„პირველად ამერიკის საკანონმდებლო ორგანომ რუსეთის კონკრეტულ ორგანიზაციებზე სანქციები მიაბა საქართველოში არსებულ მდგომარეობას, ამ მხრივ არის ეს კანონპროექტი ყველაზე მნიშვნელოვანი. კანონპროექტი მოუწოდებს ამერიკის პრეზიდენტს რომ ისეთი კომპანიები, როგორიცაა „გაზპრომი“ პოტენციურად შეიძლება მოექცეს სანქციების ქვეშ, თუ ის საქართველოსთან, უკრაინასთან და მოლდოვასთან მიმართებაში გააგრძელებს ცუდ ქმედებებს.

საუბარი არის 10 მილიონზე, სამ ქვეყანაზე, სამი წლის განმავლობაში, რაც არც ისე დიდი თანხაა, მაგრამ ეს არის თანხა, რომელიც მიმართული იქნება რუსული პროპაგანდის წინააღმდეგ. ეს რა ფორმას შეიძენს ცნობილი არ არის, თუმცა სავარაუდოდ მოხმარდება რუსული პროპაგანდის საწინააღმდეგო მესიჯების გავრცელებას იმ რეგიონებში, სადაც რუსულენოვანი მესიჯები ჩადის.“- აცხადებს საგარეო ურთიერთობების საკითხების ექსპერტი.