გაზეთ „ალიასთან“ ინტერვიუში „ქართული ოცნებიდან“ გარიცხული დეპუტატი მურმან დუმბაძე სკანდალურ ინფორმაციას აჟღერებს.

მისი თქმით, „ქართული ოცნების“ პოლიტსაბჭოს დასრულების შემდეგ დაახლოებით საათნახევრის შემდეგ დაურეკეს და დაემუქრნენ.

„უცნობმა მამაკაცმა დამირეკა. ვიღაც მოძველბიჭო ელემენტი იყო. მისი მოკლე საუბრიდან ასეთი შთაბეჭდილება დამრჩა, უნდოდა, ავყოლოდი საუბარში, მაგრამ ტელეფონი გავუთიშე. მარტო იმის თქმა მოასწრო, რომ თუ ასე გავაგრძელებდი, ჭკუას მასწავლიდა. არ მინდა მოვლენებს დავასწრო, მაგრამ იმის თქმა კი შემიძლია, რომ „ქართული ოცნების“ მხურვალე მხარდამჭერი იყო და ჩემგან ამ პარტიისა და ზოგადად, დღევანდელი ხელისუფლების კრიტიკა ვერ აიტანა. იმ დღესვე დავურეკე პატრულს, მოვიდნენ, დამკითხეს და სამართლებრივი პროცედურები დაწყებულია. იმედი მაქვს, მალე გაარკვევენ, ვინ დამირეკა“, - აცხადებს დუმბაძე.

მისი თქმით, დაგეგმილი აქვს პრეზიდენტ გიორგი მარგველაშივლთან შეხვედრა, თუმცა ინფორმაციას, რომ ამ მუქარაზე აპირებს მასთან საუბარს, სიმართლეს არ შეესაბამება.

„ხელისუფლების შტოებს შორის როცა ასეთი წინააღმდეგობაა, პრეზიდენტს აქვს ვალდებულება, ამ საქმეში ჩაერიოს. ეს უფლება კონსტიტუციით აქვს მინიჭებული. მაქვს სურვილი, აჭარის უმაღლესი საბჭოს ფრაქცია „ქართული ოცნების“ წევრებს, პრეზიდენტი შეხვდეს და აჭარაში მიმდინარე პროცესებში გაერკვეს. არაფერ უკანონოს არ ვითხოვ. ეს ყველაფერი კანონიერია და პრეზიდენტის მოვალეობაა“, -აცხადებს დუმბაძე.