სოციალურ ქსელში მიყენებული შეურაცხყოფის დასჯასთან დაკავშირებით გამოთქმულ მოსაზრებას, საზოგადოებაში არაერთგვაროვანი შეფასებები მოჰყვა.

აღნიშნულ საკითხთან დაკავშირებით „ნიუპოსტი“ „სიდას“ აღმასრულებელ დირექტორს ზვიად დევდარიანს ესაუბრა. დევდარიანი მიიჩნევს, რომ ამ საკითხში ბევრი უზუსტობა და გაუგებრობაა.

„უნდა ისჯებოდეს თუ არა ინტერნეტსივრცეში შეურაცხყოფა, აქ ბევრი რამეა დასაზუსტებელი და გაუგებარი, ბოლოს ითქვა, რომ საუბარია მხოლოდ კიბერშეტევაზე და არაა საუბარი, რომ ინტერნეტსივრცეში მხოლოდ გინების გამო დააკაონ, აქ ალბათ ყველამ თავის ვებსივრცეს უნდა მიხედოს და იმ შემთხვევაში თუ რომელიმე ადამიანი გამოთქვამს შეურაცხმყოფელ სიტყვებს თუ მოსაზრებებს უნდა წაშალოს, ან დაბლოკოს. სხვაგვარად ამის რეგულირება ადვილი არ იქნება, იმიტომ რომ ბევრი ადამიანი თავის სახელით არ არის დარეგისტრირებული და შეიძლება ამ ყველაფერს ბევრი წინაღობა ჰქონდეს. სხვთაშორის, შემდეგ დაზუსტდა კიდეც, რომ არა გინებაზე, არამედ კიბერშეტევასთან დაკავშირებით იყო საუბარი და ამ შემთხვევაში შეიძლება შსს-ს მიმართოს ვინმე დაზარებულმა და უწყებამ დაიწყოს ამ თემაზე გამოძიება“,- განაცხადა ზვიად დევდარიანმა.

რამდენიმე დღის წინ პარლამენტის ვიცე-სპიკერმა მანანა კობახიძემ სოციალურ ქსელში აგრესიული მოსაზრებების გამომთქმელ ადამიანებს მიმართა და აღნიშნა: „ამორალურ პოსტებს დაგიდებენ ეს ვითომ კაცები, სინმდვილეში არაკაცები, ბილწსიტყვაობენ და თანაც ქალის მიმართ, აი მერე მეუღლემ ან ძმამ ან შვილმა მართლა შუბლი რომ გაუხვრიტოს, მერე არ გვითხრას ვინმემ კრიმინოგენული ვითარება დამძიმდაო, შეურაცხყოფის და ლანძღვის თმენის ვალდებულება ნამდვილად არ აქვთ ადამიანებს და ისე, პოლიტიკოსიც ადამიანია“.

ზვიად დევდარიანის თქმით, პოლიტიკოსების მხრიდან გამოთქმული შეფასებები და ანალიზი, გარკვეულ შემთხვევაში სიძულვილის ენას კი არ ებრძვის არამედ ახალისებს.

„მაგალითად, ეს იყო 17 მაისის მოვლენეთან დაკავშირებით და შემდეგ ძალიან ბევრ შემთხვევაში მათ შორის იყო შეუწყნარებლობა პოლიტიკური ოპონენტების მიმართაც, რომელიც ხშირად გადაიზრდება და შემდეგ არამხოლოდ სიძულვილის ენას სცილდება, არამედ ფიზიკური დაპირისპირების შემთხვევებიც კი გვქონდა. რეალურად ეს არის ვითარება, როდესაც მეტი პასუხისმგებლობა მართებს პოლიტიკოსებს შეფასების და გამონათქვმების დროს, რომელსაც ისინი საზოგადოებრივ სივრცეში აკეთებდნენ“,- აღნიშნა ზვიად დევდარიანმა.

საპარლამენტო უმცირესობის წევრი სერგო რატიანი კი მიიჩნევს, პოლიტიკოსების რეაქციებმა სიტყვის და გამოხატვის თავისუფლება არ უნდა დააზარალოს.

„როგორც ჩანს მანანა კობახიძეს გაუჩნდა პრობლემები და ეს პრობლემა არის ამაზე რეაქცია, რაც აშკარად მძიმე შედეგს გამოიღებს. ჩვენს სოციალურ ქსელებშიც შემოდიან და შეურაცხყოფას გვაყენებენ, გასაგებია, რომ ეს არ არის სასიამოვნო, მაგრამ პირველ რიგში ჩვენ გვაქვს გარკვეული თმენის ვალდებულება და ჩვენმა რეაქციებმა არ უნდა დააზარალოს სიტყვის და გამოხატვის თავისუფლება, მესმის რომ ეს არის ძალიან მძიმე, ჩვენ გამოგვიცდია, რომ ეს არ არის სასიამოვნო, მაგრამ ადამიანებს ნებისმიერ შემთხვევაში, როდესაც პრობლემა ექმნებათ, შეიძლება ჩვენ არ ვიყოთ ამის მიზეზი, მაგრამ გამოსავლის მოძებნას ჩვენგან ითხოვენ და ამ დროს ჩვენ არ უნდა მივაყენოთ საზოგადოებას დარტყმები და არ უნდა შეიზღუდოს ინტერნეტსივრცე“,- განაცხადა რატიანმა „ნიუპოსტთან“ საუბარში.

უმცირესობის დეპუტატი მიიჩნევს, რომ ამ კანონის მიღება ტოტალურ დევნას გამოიწვევს.

„რომელიღაც პოლიტიკოსს რა ეწყინება ვისგან და რა გააღიზიანებს, ეს რა თქმა უნდა ვერ გახდება სახელმწიფოს დევნის საგანი, ძალაუფლების მქონდე პირს აქვს განსაკუთრებული ვალდებულება საზოგადოების წინაშე. ისედაც კრიტერიუმები, თვითონ შეურაცხყოფაც ფართო ცნებაა“,- განაცხადა სერგო რატიანმა.