გიორგი კვირიკაშვილმა ,,დელტას" წარმოება დაათვალიერა

პოლიტიკა - 16:13, 19 Sep, 2014

2952

საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი სახელმწიფო სამხედრო სამეცნიერო-ტექნიკურ ცენტრ (სსსტც) "დელტას" ესტუმრა.
როგორც ეკონომიკისა და მდგრადი განვითარების სამინისტროში აცხადებენ, გიორგი კვირიკაშვილმა ჯავშანტრანსპორტიორი დიდგორი ერთი, დიდგორი ორი, დიდგორი სამი, ქვეითთა საბრძოლო მანქანა ,,ლაზიკა", ზალპური ცეცხლის რეაქტიული სისტემა რს-122, სამოქალაქო თვითმფრინავი ,,ტამ-ჯეტი,, სამოქალაქო თვითმფრინავი ,,ელიტ-ჯეტი", ინტეგრირებული ქსელების მანქანა და ,,დელტას" მიერ წარმოებული სხვა საბრძოლო თუ სამოქალაქო ტექნიკა დაათვალიერა.
მინისტრმა უახლოეს ტექნოლოგიებზე დაფუძნებული წარმოება მოინახულა და ,,დელტას" მიმდინარე პროექტებს გაეცნო.
სამინისტროს ინფორმაციით, ვიცე-პრემიერს სამეცნიერო-ტექნიკურ ცენტრში მეგზურობა ,,დელტას" გენერალური დირექტორის მოვალეობის შემსრულებელმა უჩა ძოძუაშვილმა გაუწია. ,,დელტას" მენეჯმენტმა ვიცე-პრემიერს გაწეული საქმიანობის შესახებ ანგარიში ჩააბარა.
,,დელტას სიმდიდრე ის ადამიანები არიან, რომლებიც აქ მუშაობენ. ჩვენი ვალია ისინი შევინარჩუნოთ და მათი პოტენციალი ბოლომდე გამოვიყენოთ", - აღნიშნა გიორგი კვირიკაშვილმა.
სამინისტროს ინფორმაციით, სსსტც "დელტას" შემადგენლობაშია შემდეგი სამეცნიერო ინსტიტუტები და კომპანიები: სოხუმის ილია ვეკუას ფიზიკა-ტექნიკის ინსტიტუტი; ინსტიტუტი "ოპტიკა"; გრიგოლ წულუკიძის სახელობის სამთო ინსტიტუტი; რაფიელ დვალის მანქანათა მექანიკის ინსტიტუტი; თავაძის მეტალურგიისა და მასალათმცოდნეობის ინსტიტუტი; მიკრო და ნანო ელექტრონიკის ინსტიტუტი, შპს "თბილავიამშენი" და შპს "დელტა ინტერნეიშენელი".
სსსტც "დელტას" პროდუქცია, ძირითადად, საქართველოში იყიდება.