საქართველოს ექსპრეზიდენტის მიხელ სააკაშვილის ქონების დაყადაღების საფუძველი სასამართლოს არ ჰქონდა. ამის შესახებ ექსპრეზიდენტის ადვოკატმა ოთო კახიძემ „რუსთავი 2“-თან საუბრისას განაცხადა.

„არანაირი დასაბუთება სასამართლოს განჩნებაში ყადაღის დადების შესახებ არ გვხდება. არ ვიცით რა არგუმენტებზე დაყრდნობით მოხდა ქონების დაყადაღება. სააკაშვილს ბრალი ედება ქონების გაფლანგვაში და არა - მითვისებაში. არავითარი კავშირი დანააშაულსა და დაყადაღებულ ქონებას შორის არ არსებობს. დაყადაღებულ ქონებასა და დანაშაულს შორის მიზეზშედეგობრიობა უნდა დადგინდეს ანუ ეს ქონება უნდა იყოს დანაშაულებრივი გზით მოპოვებული, ან ამ ქონების მიმართ უნდა იყოს დანაშაული ჩადენილი. როდესაც დანაშაულსა და ქონებას შორის კავშირი არ არის დაყადაღების საფუძველი არ არსებობს“, - განაცხადა ოთო კახიძემ.

ადვოკატის შეფასებით, აღნიშნული ფაქტი არის შურისძიება რომელიც ბიძინა ივანიშვილმა შეუკვეთა,

„რაც შეეხება დაყადაღებულ ქონებას -დაყადაღებულია ყვარლის ნაკვეთი, სააკაშვილის ბებიის საკუთრებაში არსებული 500 კვადრატული მეტრის ფართობი სოფელ ნატანებში, ასევე ტოიოტას მარკის ავტომობილი, რომლითაც სარგებლობს მისი დედა, სანდრა რულოვსის საკუთრებაში არსებული ბინა ბარნოვზე. ჩვენ გვრჩება შანსი ვივარაუდოთ, რომ ადგილი აქვს პრიმიტიულ შურისძიებას მიხეილ სააკაშვილის მიმართ ბიძინა ივანიშვილის დაკვეთით“, - განაცხადა კახიძემ.