აფხაზეთის უმაღლეს საბჭოში დაპირისპირებაა - თამაზ ხუბუა აფხაზთა კრებას უერთდება

პოლიტიკა - 14:35, 19 Sep, 2014

2078

აფხაზეთის უმაღლეს საბჭოში დაპირისპირებაა. დეპუტატი თამაზ ხუბუა მიიჩნევს, რომ აფხაზეთის მთავრობის თავმჯდომარე ვახტანგ ყოლბაია არაკანონიერად არის არჩეული. 27 სექტემბერს აფხაზთა კრება იმართება, სადაც ერთ-ერთი საკითხი, სწორედ აფხაზეთის მთავრობის გადადგომა იქნება. „ნიუპოსტი“ დეტალებზე აფხაზეთის უმაღლესი საბჭოს დეპუტატ თამაზ ხუბუას ესაუბრა.

„აფხაზეთის კრება 27 სექტემბერს 12:00 საათზე ჭადრაკის სასახლეში ჩატარდება. ამ კრების ორგანიზატორია მოძრაობა „დაბრუნება“, ასევე არასამთავრობო და პოლიტიკური ორგანიზაციები. მე როგორც უმაღლესი საბჭოს დეპუტატი სრულ მხარდაჭერას ვუცხადებ მათ და თუ ორგანიზატორები ჩათვლიან, რომ ჩავერთო ამ კრების ორგანიზაციულ და აკადემიურ დონეზე ჩატარებაში, სიამოვნებით მივიღებ ამ გამოწვევას.

დიდ მნიშვნელობას ვანიჭებ იმას, რომ ამ კრებას დაესწრნენ აფხაზეთის სამთავრობო და უმაღლესი საბჭოს წევრები, რამეთუ მოსალოდნელია სხვა საკითხებთან ერთად დაისვას დევნილთა სახელისუფლებო სტრუქტურების საქმიანობის ეფექტიანობიის გაზრდის და შემდგომი რებრენდინგის საკითხები. ამიტომ არც ერთი შეკითხვა პასუხგაუცემელი არ უნდა იყოს. ასე, რომ მე კრებას სრულ მხარდაჭერად ვუცხადებ და სიამოვნებით მივიღებ მონაწილეობას მასში“, - აცხადებს ხუბუა.

მისი თქმით, კრებაზე განხილული იქნება აფხაზეთის უმაღლეს საბჭოში დევნილობაში არჩევნების ჩატარების საკითხი, რომელსაც ხუბუა მხარს უჭერს.

„როგორც უკვე ავღნიშნე კრებაზე, დიდი ალბათობით სხვა საკითხებთან ერთად დაისმევა ახლანდელი მთავრობის გადადგომის საკითხი და მეორე, აფხაზეთის უმაღლეს საბჭოში დევნილობაში არჩევნების ჩატარების საკითხი. მე პირველს იმთავითვე ვუჭერდი, რადგან აფხაზეთის მთავრობის თავმჯდომარის მოვალეობის შემსრულებელი დანიშნულია კონსტიტუციის უხეში დარღვევით და ამაში უმაღლეს საბჭოსაც მიუძღვის გარკვეული ბრალი. რაც შეეხება უმაღლესი საბჭოს დევნილობაში არჩევნების ჩატარებას, ამ საკითხს მხარს ვუჭერ. მინდა გითხრათ, რომ მხარს ვუჭერ ყველა იმ კონსტიტუციუს ღონისძიებას, რომელიც უზრუნველყოფს აფხაზეთის უმაღლესი საბჭოს ლეგიტიმაციის მკაცრ და მაღალხარისხიანი დაცვის პირობებში არჩევნებში ჩატარების შესაძლებლობას“, - აცხადებს ხუბუა.

კითხვაზე, ხომ არ ჰყავს საკუთარი კანდიდატი, რომელსაც აფხაზეთის მთავრობის თავმჯდომარის პოსტზე მხარს დაუჭერდა, ხუბუა ამბობს, რომ „ამ საკითხს არ განიხილავს“.

„მიმაჩნია, რომ მთავრობის ხელმძღვანელი კონსტიტუციის დარღვევით არის არჩეული და მისი დანიშვნის შემდეგ უმაღლესმა საბჭომ მასზე მორგებული ნორმატიული აქტები მიიღო იმისათვის, რომ ის ადგილზე დაემაგრებინათ.ამ ყველაფერს მოჰყვა ნეპოტიზმის, მაავნებლობის, ხელისუფლების უზურპაციის ნიშნის მატარებელი ქმედებები უმაღლესი საბჭოს შიგნით. თუმცა ის, რომ ჩემი კანდიდატურა მყავდეს, ამ საკითხს არ განვიხილავთ, - განაცხადა ხუბუამ.