პრეზიდენტი GIPA-ს კურსდამთავრებულთათვის დიპლომების გადაცემის ცერემონიას დაესწრო

პოლიტიკა - 10:03, 19 Sep, 2014

1365

პრეზიდენტი დღეს საქართველოს საზოგადოებრივ საქმეთა ინსტიტუტის (GIPA) კურსდამთავრებულთათვის დიპლომების გადაცემის მე-20 საზეიმო ცერემონიას დაესწრო. გიორგი მარგველაშვილმა დამსწრე საზოგადოებას სიტყვით მიმართა და ახალგაზრდებს წინსვლა უსურვა. ქვეყნის პირველმა პირმა ყურადღება იმ განსაკუთრებულ გარემოზე გაამახვილა, რომელიც საზოგადოებრივ საქმეთა ინსტიტუტში ქართველმა და უცხოელმა პროფესრ-მასწავლებლებმა ერთობლივად შექმნეს - თავისუფლებაზე, პროფესიონალიზმსა და მომავალზე ორიენტირებული გარემო. მისი თქმით, GIPA არის ძალიან ძლიერი ქართული სკოლა, რომელიც ჩამოყალიბდა პარტნიორების პროფესიონალიზმის საფუძველზე და საუკეთესო გამოცდილების გაზიარებით.

„მინდა კიდევ ერთხელ მოგესალმოთ კურსდამთავრებულებს, კიდევ ერთხელ მივესალმო ჩემს კოლეგებს, რომლებთან ერთადაც ვმუშაობდი, კიდევ ერთხელ გამოვხატო პატივისცემა იმ ადამიანების მიმართ, ვისაც წვლილი მიუძღვის ამ ინსტიტუტის ჩამოყალიბებაში. თქვენთან ერთად, სტუდენტებთან ერთად ვიზიარებ დღევანდელი წარმატების სიხარულს და გარკვეულ სევდასაც, რომელიც გამოწვეულია იმით, რომ დღეს ტოვებთ GIPA-ს. მსურს მოგილოცოთ დღევანდელი დღე, დაგილოცოთ გზა და კიდევ ერთხელ მივულოცოთ ჩვენს სამშობლოს ის, რომ თავისუფლების სულისკვეთების მატარებელი ადამიანების კიდევ ერთი პლეადა უერთდება საქართველოს მშენებლობის პროცესს. გისურვებთ წარმატებას და გამარჯვებას!“ - განაცხადა საქართველო პრეზიდენტმა.

საქართველოს საზოგადოებრივ საქმეთა ინსტიტუტის განვითარებაში შეტანილი წვლილისათვის გიორგი მარგველაშვილს სიმბოლური ჯილდო - GIPA-ს სამკერდე ნიშანი გადასცეს.

ღონისძიებას ასევე ესწრებოდნენ თბილისის მერი დავით ნარმანია, აშშ-ის ელჩი საქართველოში ბ-ნი რიჩარდ ნორლანდი და სხვები.