გედევან ფოფხაძემ გიორგი ღვინიაშვილს ბოდიში მოუხადა

პოლიტიკა - 20:18, 18 Sep, 2014

3708

საპარლამენტო უმრავლესობის დეპუტატმა გედევან ფოფხაძემ პლენარულ სხდომაზე, 2012 წელს, წინასაარჩევნოდ კახეთში მომხდარ ტრაგედიაზე ისაუბრა და აღნიშნა, რომ მსგავსი შემთხვევის პოლიტიკური მიზნებისთვის გამოყენება დაუშვებელია.

ფოფხაძის თქმით, იმ დროს ვითარება საკმაოდ დაძაბული იყო, ფონი კი – ემოციური, -“ეს არის კონკრეტული რამ, რის გაკეთებასაც არავის მოუწონებს” და ოპოზიციონერ კოლეგას, გიორგი ღვინიაშვილს მოუბოდიშა.
“ჩემთვის ემოციურად ძალიან რთულია ამ თემაზე საუბარი. ამ საკითხის ერთი მხარე არის მორალური, ეს არ უკავშირდება მხოლოდ იმ ოჯახის და ბავშვის ტრაგედიას. უფრო მნიშვნელოვანი ნაწილია ის, რაც მე მეხება პირადად, თუმცა წესით, რატომ უნდა მეხებოდეს, მაგრამ შემეხო კონიუნქტურიდან გამომდინარე. ასე არ უნდა ხდებოდეს, ადამიანის ტრაგედიას, რა ემოციური ფონიც უნდა იყოს შექმნილი, არავინ უნდა იყენებდეს პოლიტიკური მოტივაციით. ეს ვიღაცამ შეიძლება შეცდომად ჩათვალოს, ვიღაცამ - ამორალობად, ვიღაცამ - უზნეობად. მე არ ვიცი, რა ხდებოდა საარჩევნო ვითარებაში იმ კონკრეტულ რაიონში, მთლიანობაში ვიცი, რომ ძალიან დაძაბული ვითარება იყო საქართველოში და ყველა დაძაბულები ვიყავით. ძალიან ბევრი უსამართლობა ჩვენს მიმართაც ხორციელდებოდა, რომელსაც ახლა აღარ ვიხსენებთ და არ ვსაუბრობთ. ახლა არც მინდა, ეს გავიხსენო, ეს არის კონკრეტული რამ, რაც არავინ უნდა გააკეთოს, ჩვენი გუნდის წევრია თუ სხვა გუნდის, მე ამას ვერ გავამართლებ. თუ ჰქონდათ რაიმე წინაპირობა, ემოციური თუ სხვა სახის, ეს ამ ადამიანების პრობლემაა. რეალობა ისაა, რომ მათ უნდა გაეკეთებინათ ის, რის უფლებასაც ახლა ჩემს თავს დაგვიანებით მივცემ. არ ვიცი, ეს გიორგისთვის რამდენად ღირებული იქნება, მაგრამ კიდევ ერთხელ გიფიქსირებთ ჩემს ბოდიშს და ჩემს გულისტკივილს იმის გამო, რაც მოხდა, ადამიანურად. ეს არის ის, რაც დაგვიანებულად მაინც გაკეთებეულია ჩემს მიერ”, - განაცხადა ფოფხაძემ.