რაფალიანცის საქმეზე საპარლამენტო კომისიის შექმნის საკითხი ჩავარდა

პოლიტიკა - 19:47, 18 Sep, 2014

1894

ბარბარე რაფალიანცის საქმეზე კომისიის შექმნის მიზანშეწონილობის საკითხზე მსჯელობა საკანონმდელო ორგანოში დეპუტატების მწვავე გამოსვლების ფონზე მიმდინარეობდა.

საკითხის კენჭისყრაზე დაყენებამდე განცხადებები საპარლამენტო უმცირესობის წევრებმა ირმა ნადირაშვილმა, გიორგი ღვინიაშვილმა, გიგი წერეთელმა, პავლე კუბლაშვილმა, ხათუნა გოგორიშვილმა და სხვებმა გააკეთეს.

„დღეს წავიკითხე პრემიერის განცხადება, რომელიც ნამდვილად შემაძრწუნებელი და საგანგაშოა. ჩავთავალე, რომ ეს არის სიგნალი, რომ ამასთან დაკავშირებით უმრავლესობის წევრები უარყოფით გადაწყვეტილებას მიიღებენ. მე გეკითხებით ადამიანურად და მარტივად, რა უდგას წინ ქვეყნის პრემიერ-მინისტრს ირაკლი ღარიბაშვილს, რომ უბრალოდ გააკეთოს განცხადება, რომ ის ამ საქმეს გამოიძიებს. თურმე მე რომ ამ საქმის გამოძიებას ვითხოვ, ეს უზნეობაა. თურმე უზნეობაა ის, რომ ამ საქმეში ინტერესი აქვს ამ ოჯახს. როგორც ოჯახს არ უნდა აინტერესებდეს სიმართლე საქმეზე, როცა მათ 10 თვის ბავშვი მოუკლეს?! მე ხომ პირდაპირ დამაბრალეს ამ ბავშვის მოკვლა, მაგრამ ამის მიუხედავად, მე არავისთვის ხელი არ დამიდია, რომ მე კი არა, შენ მოკალითქო. არავის ვაბრალებ, უბრალოდ ვითხოვ, რომ ამ საქმეზე გამოძიება ჩატარდეს. ფაქტია, რომ “ქართულმა ოცნებამ” და თქვენმა გუნდმა ეს საქმე პოლიტიკური მიზნებისთვის გამოიყენეთ. ეს ხომ ყველამ ვიცით და დავინახეთ”, - განაცხადა ღვინიაშვილმა

საპარლამენტო უმცირესობის განცხადებებს უმრავლესობის წარმომადგენლებმა უპასუხეს. ზვიად ძიძიგურმა სიტყვით გამოსვლისას განაცხადა, რომ ის ამგვარი საგამოძიებო კომისიის შექმნას კატეგორიულად ეწინააღმდეგება.

„მინდა გითხრათ, რომ “ნაციონალური მოძრაობიდან” ჩვენს კოლეგებს თავიანთი გეგმა აქვთ, რაც მდგომარეობს იმაში, რომ ქვეყანაში შექმნან ისტერიული ფონი, რომ ყველა მიმართულებით კატასტროფა ხდება - ეკონომიკაში, განათლებაში და ა.შ. ამ გეგმის ნაწილია ეს დროებითი საგამოძიებო კომისიის შექმნა, რასაც ეს ხალხი ითხოვს. მათ არც რაფალიანცის ოჯახი ენაღვლებათ, არც იპოთეკარები, არც დევნილები და არც საზოგადოების არცერთი ფენა, მათ თავიანთი გეგმა აქვთ, რომელიც მიხეილ სააკაშვილის სცენარია და თუ ჩვენ ვაპირებთ, მიხეილ სააკაშვილის სცენარით ცხოვრებას და პოლიტიკურად ვმართოთ ეს ქვეყანა, ასეთ შემთხვევაში დავუჭიროთ მხარი “ნაციონალურ მოძრაობის” გეგმას”, - განაცხადა ძიძიგურმა.