უელსის სამიტზე ჩემი თანხლება პრეზიდენტს არ სიამოვნებდა

უელსის სამიტზე ჩემი თანხლება პრეზიდენტს არ სიამოვნებდა - ფანჯიკიძე

პოლიტიკა - 12:13, 17 Sep, 2014

1536

საგარეო საქმეთა მინისტრი მაია ფანჯიკიძე ნატო-ს უელსის სამიტზე საქართველოს პრეზიდენტსა და მთავრობის წევრებს შორის არაკოლეგიალურ დამოკიდებულებაზე საუბრობს.

მინისტრი აცხადებს, რომ გიორგი მარგველაშვილმა საჭიროდ არ ჩათვალა მისი დასწრება ისეთი ფორმატის შეხვედრებზეც კი, რომელიც თავისთავად დელეგაციის ხელმძღვანელისა და საგარეო უწყების ხელმძღვანელის მონაწილეობას გულისხმობს.
“უელსის სამიტის მიმდინარეობისას მართლაც იყო აბსოლუტურად არაკოლეგიალური დამოკიდებულება პრეზიდენტსა და მინისტრებს შორის და რამდენიმე შეხვედრაზე, რომელზეც ჩაწერილები ვიყავით მინისტრები, შეხვედრის დაწყებამდე ცოტა ხნით ადრე გვითხრეს, რომ ჩვენი მისვლა საჭირო არ იყო. შესაბამისად, პრეზიდენტმა ჩვენ შეხვედრებს არ დაგვასწრო. გარდა ამისა, უნდა ვთქვა, რომ როდესაც მოწვევაა ფორმატით – “1+1”, ეს ყოველთვის საერთაშორისო დიპლომატიის ენაზე გულისხმობს დელეგაციის ხელმძღვანელის და საგარეო საქმეთა მინისტრის დასწრებას. არც ერთ ასეთ ფორმატში უელსის სამიტის დროს მე მონაწილეობა არ მიმიღია, რადგან აბსოლუტურად აშკარა იყო, რომ ჩემი თანხლება პრეზიდენტს არ სიამოვნებდა თუ არ მიაჩნდა მიზანშეწონილად. ფაქტია, რომ მთელი ჩემი შესაძლებლობები იქ კოლეგებთან ურთიერთობის დამყარებისა ვერ გამოვიყენე. მაგალითად, იყო ერთი ასეთი მოწვევა, სადაც მე წინასწარ ვიყავი შეთანხმებული უკრაინის, დანიის საგარეო საქმეთა მინისტრებთან, კიდევ რამდენიმე კოლეგასთან, რომ იმ ფორმატის დროს გვექნებოდა უფრო მეტი კომუნიკაცია, ეს ვერ განვახორციელე სწორედ იმიტომ, რომ პრეზიდენტმა არ ჩათვალა საჭიროდ ჩემი დასწრება იმ ფორმატებზე, რომელზეც ბუნებრივად უნდა ყოფილიყო გათვალისწინებული საგარეო საქმეთა მინისტრის მონაწილეობა. ძალიან ვწუხვარ, რომ ეს ასე იყო, მაგრამ მიუხედავად ჩემი რამდენიმე მცდელობისა, მე იმ შეხვედრებზე ვერ მოვხვდი”, - განაცხადა მაია ფანჯიკიძემ.