მურმან დუმბაძის კვლავ ვიცე-სპიკერის რანგში განაგრძობს მუშაობას

პოლიტიკა - 10:55, 17 Sep, 2014

1667

მურმან დუმბაძის ვიცე-სპიკერის პოსტიდან გაწვევის საკითხზე დეპუტატები დღეს იმსჯელებენ. ჯერჯერობით უცნობია როდის გაიმართება კონსულტაციები. ვიცე-სპიკერის პოსტიდან ბათუმის მაჟორიტარი დეპუტატის გასაწვევად აჭარის 6 კაციანი დეპუტაციის 4 ხმაა საჭირო.

ოპოზიციაში გადასულ მურმან დუმბაძეს ყოფილი თანაგუნდელები ვიცე-სპიკერის პოსტის დატოვებას უჩევენ, თუმცა იგი აჭარის დეპუტაციის კვოტით მიღებული თანამდებობის დათმობას არ აპირებს. დაპირისპირებაში ჩარევას არ გეგმავს უმცირესობა.

„საქართველოს პარლამენტის წევრის და ვიცე-სპიკერის რანგში ვაგრძელებ მუშაობას. აჭარის დეპუტაციის მაჟორიტარული წესით არჩეული 6 წევრიდან ოთხმა უნდა დაუჭიროს მხარი. მე დარწმუნებული ვარ, რომ ასეთი 4 წერვის მოძებნა დეპუტაციიდან არის შეუძლებელი. მე მივმართე სამართალდამცავ ორგანოებს უნდა გითხრათ, რომ ერთ ზარზე უკვე გამოძიება არის დაწყებული. მე დღეს ოფიცალურად განვაცხადე, რომ ორი ზარი შემოვიდა რომელიც ეხებოდა ჩემს პოლიტიკურ უკანასკნელ აქტივობებს“,- განაცხადა მურმან დუმბაძემ.

პარლამენტში შუახევის მაჟორიტარი დეპუტატი ომარ მეგრელიძე ამბობს, რომ აღნიშნულ საკითხზე თანაგუნდელებთან კონსულტაცია არ ჰქონია.

„მურმან დუმბაძის საკითხი „ქართული ოცნების“ შიდა პრობლემაა. ვფიქრობ ჩემი მონაწილეობის გარეშეც შეუძლიათ ეს პრობლემა გადაწყვიტონ. აჭარის კვოტით ვართ ექვსი მაჟორიტარი დეპუტატი და 5 არიან უმრავლესობის წევრი. ამიტომ თავისუფლად შეუძლიათ გამოიწვიონ ბატონი მურმანი. თუ ჩემი ხმა აუცილებელი გახდება, თანაგუნდელებთან ამ საკითხზე მექნება კონსულტაცია და ამის შემდეგ მივიღებ გადაწყვეტილებას“, - ამბობს მეგრელიძე.