ექსპერტი მამუკა არეშიძე „ალიასთნ“ საუბარში კონკრეტულ ფაქტს იხსენებს, რომლითაც დასტურდება რომ ექსპრემრს ბიძინა ივანიშვილს უსმენენ.

„ზუსტად ვიცი, როგორ მოუსმინეს ახალციხის კონრეტული ფაქტის გამო ბიძინა ივანიშვილს. სხვათა შორის, ეს მოხდა აგვისტოში... მე არ მაქვს უფლება, კონკრეტული დეტალები გავამხილო, მაგრამ გიდასტურებთ, რომ ზუსტად ბიძინა ივანიშვილს მოუსმინეს, როდესაც მას მოახსენეს კონკრეტული ამბავი სამცხე-ჯავახეთზე ტელეფონით და ეს ეხებოდა კონკრეტული თანამდებობის პირების სამსახურეობრივ გადაცდომას, იმავე საღამოს იმ კონკრეტულმა პირებმა, ვიზეც იყო საუბარი, იცოდნენ, რომ ბიძინა ივანიშვილთან მათზე საუბარი შედგა. ეს ადამიანები, ვისზეც იყო საუბარი წარმოადგენდნენ ძალოვან სტრუქტურებს. ეს შეიძლება პირდაპირი მტკიცება არ არის, მაგრამ შეგიძლიათ, საბუთად ჩათვალოთ“, - აცხადებს არეშიძე.

რაც შეეხება ვარაუდს, რომ „ნაციონალური მოძრაობა“ კონსტიტუციურ გადატრიალებას გეგმავს, არეშიძე მიიჩნევს, რომ ხელისუფლებამ ამის თავიდან ასაცილებლად ყველაფერი უნდა გააკეთოს.

„მოდით ჩავიხედოთ იმ წერილში, რომელიც უგულავამ თანაპარტიელებს მიწერა... იქ ნახსენებია ე.წ. დაჩაგრული სტუდენტები, იქ საუბარია რეცეპტით უკმაყოფილო ხალხზე, როდესაც ხარ ხელისუფლებაში ეს მიზეზები არ უნდა მისცე „ნაციონალურ მოძრაობას“. რასაც ლაპარაკობს უგულავა, ის გულისხმობს სახელმწიფო გადატრიალებას და არა არეულობას, მაგრამ რასაც ლაპარაკობს ბოკერია (საპროტესტო ტალღის აგორებაზე) ეს არის კონსტიტუციურ ჩარჩოებში მოქცეული საზოგადოებრივი ნების დემონსტრირება. ამიტომ ხელისუფლებამ ყველაფერი უნდა გააკეთოს, რომ „ნაციონალურ მოძრაობას“ ახალი ელექტორატი არ შეემატოს და არავითარი გადატრიალება არ მოხდეს“, - ამბობს არეშიძე.

ექს-პრემიერ ბიძინა ივანიშვილი „კვირის პალიტრასთან“ ინტერვიუში არ გამორიცხავს, რომ მოსმენები ეხლაც ხდებოდეს.

„თუ გვისმენენ, ალბათ ისევ ესენი (ნაციონალები) გვისმენენ. მათი მხრიდან ისმის კრიტიკა, რომ მოსმენებს დღევანდელი მთავრობა ახორციელებს. არადა, ერთი მაგალითი არ დაუსახლებიათ“, -აცხადებს ივანიშვილი.