ვიცე-პრემიერის კახი კალაძის ინფორმაციით, მასსა და პრეზიდენტს შორის კომუნიკაცია რამდენჯერმე შედგა. საინფორმაციო გამოშვება „ქრონიკასთან“ ინტერვიუში კალაძე იხსნებს, რომ ერთ-ერთი ასეთი კომუნიკაციის დროს გიორგი მარგველაშვილმა მისი თხოვნა არ გაითვალისწინა.

„პირადად მე რამოდენიმეჯერ მქონდა კომუნიკაცია. იყო მარეგულირებელ კომისიაში გათავისუფლდა ერთი ადგილი. იქ პრეზიდენტმა უნდა წარუდგინოს კანდიდატი მთავრობას.მოგეხსენებათ, მარეგულირებელი კომისია ენერგეტიკის დარგის განვიტარებისთის მნიშვნელოვანია. ამიტომ, სწორი პიროვნების შერჩევა მნიშვნელოვანი იყო. ამასთან დაკავშირებით, პირადად მე დავუკავშირდი გიორგი და ვთხოვე, გაეთვალისწინებინა პიროვნება, ვინც ჩვენი მხრიდან იქნებოდა შეთავაზებული, თუმცა ეს ასე არ მოხდა“, - აცხადებს კალაძე.

რაც შეეხება ბოლო პერიოდში მედიაში გავრცელებულ ინფორმაციას, თითქოს კახი კალაძეს პრემიერთან ურთიერთობა დაეძაბა, კალაძე უარყოფს.

„რაც შეეხება ღარიბაშვილთან დაპირისპირებას არის სიცრუე. თუმცა უნდა ავღნიშნო, რომ არსებობს ჯგუფები ვინ ამ მიმართულებით მუშაობენ. ისინი ცდილობენ საზოგადოებაში შეიტანონ აზრი, რომ ჩემსა და ირაკლი შორის დაპირისპირებაა. ყველა ადამიანი გაშიფრულია, ვინც ამას ახორიცელებდა, თუმცა მათი დასახელებისგან თავს შევიკავებ. ამ ადამიანებს ვურჩევ, რომ ქვეყანას და საქმეს მიხედონ“, - განაცხადა კალაძემ.