ფრაქცია „ ნაციონალური მოძრაობა" შინაგან საქმეთა მინისტრს ფრაქციის სხდომაზე იწვევს. ამის შესახებ უმცირესობის წევრმა გოკა გაბაშვილმა განაცხადა.

მისი თქმით, ჭიკაიძემ ქვეყანაში შექმნილ კრიმინოგენურ ვითარებასთან დაკავშირებით არსებულ კითხვებს პასუხი უნდა გასცეს.

„ქვეყანაში კრიმინოგენური ვითარება დამძიმებულია. საქართველოს მოქალაქეები განსაკუთრებით მძიმე დანაშაულის მატებას გრძნობენ. იყო ისეთი საშინელი ფაქტები, რომლებიც 90-იანი წლების მერე აღარ ყოფილა. ვგულიხსმობს, ადამიანების დაუთოება, დაყაჩაღება, ძარცვა და ასე შემდეგ. ამის საპასუხოდ კი შინაგან საქმეთა სამინისტრო ისევ შევარდნაძისეულ მეთოდს, რეიდებს იყენებს. ეს არის აბსოლუტურად არასწორი გზა“, - განაცხადა გაბაშვილმა.

მისივე თქმით, თუ შს მინისტრი ქუთაისში, ფრაქციის სხდომაზე არ მივა, ეს იქნება საქართველოს პარლამენტის რეგლამენტის 91-ე მუხლის დარღვევა.

„ამ შეხვედრების მუდმივად გადადება და გაუქმება არის საქართველოს პარლამენტის რეგლამენტის 91-ე მუხლის მესამე პუნქტის უგულვებელყოფა. შს მინისტრი ვალდებულია მოვიდეს პარლამენტში და დაესწროს ფრაქციის სხდომას ", - აღნიშნა გაბაშვილმა.