„საქართველოს პრეზიდენტს, მის ადმინისტრაციას უნდა ჰქონდეთ სათანადო სამუშაო სივრცე, სადაც განახორციელებენ საკუთარ კომპეტენციასა და უფლებამოსილებებს“, - ამის შესახებ პრეზიდენტის ადმინისტრაციის უფროსმა დავით პატარაიამ ექს-პრემიერის იმ განცხადების კომენტირებისას განაცხადა, სადაც ივანიშვილი პრეზიდენტის ადმინისტრაციის ხარჯებზე საუბრობს.

მისი თქმით, ყოფილ პრეზიდენტს რამდენიმე რეზიდენცია ემსახურებოდა, გიორგი მარგველაშვილმა ყველა მათგანზე უარი თქვა.

„პრეზიდენტს და მის ადმინისტრაციას უნდა ჰქონდეს სათანადო სამუშაო სივრცე, სადაც ის საკუთარ კომპეტენციასა და უფლებამოსილებებს განახორციელებს. შეგახსენებთ, რომ ყოფილ პრეზიდენტს რამდენიმე რეზიდენცია ემსახურებოდა. პრეზიდენტმა გიორგი მარგველაშვილმა ყველაზე უარი თქვა. მხოლოდ დატოვებული იქნა ეს რეზიდენცია, სადაც ახლა ვიმყოფებით. აღნიშნული რეზიდენცია აშენების მომენტიდან ემსახურებოდა პრეზიდენტის უფლებამოსილების განხორციელებას. საქართველოს პრეზიდენტი მართლაც გადმოვიდა თავის ადმინისტრაციასთან ერთად ამ შენობაში საკუთარი უფლებამოსილების განსახორციელებლად და ეს მან განმარტა, რომ იყო პოლიტიკური გადაწყვეტილება, ამიტომ საკითხის განხილვა ყოველთვის უნდა მოხდეს პოლიტიკურ ჭრილში, პრეზიდენტის კონსტიტუციური უფლებამოსილების განხორციელების ჭრილში და არ უნდა იქნეს დაყვანილი უმნიშვნელო სამეურნეო თემებამდე“, - განაცხადა პატარაიამ.