კოალიცია „ქართული ოცნების“ ყოფილი წევრი დეპუტატი მურმან დუმბაძე აცხადებს, რომ მისი გათავისუფლება, ბიძინა ივანიშვილთან იყო შეთანხმებული.

დუმბაძე მიიჩნევს, რომ ხელისუფლება არასწორი გზით მიდის, - ამის შესახებ მან „პრაიმტაიმის“ პრესკლუბში განაცხადა.

„მე მიმაჩნია, რომ ხელისუფლება მიდის არასწორი გზით, როდესაც ხელისუფლების ერთი შტო განსაკუთრებით კი საპრეზიდენტო არის დაკნინებული და ამას შეგნებულად აკეთებს ადამიანი, რომლის მიმართაც ჩვენ ანგარიშვალადებულები ვართ, მას დიდი დამსახურება აქვს ქვეყნის წინაშე მაგრამ არ შეიძლება მისი კარნახით სახელმწიფო სტრუქტურები იმართებოდნენ. მე არ მაქვს ამის დამადასტურებელი საბუთები, მაგრამ ვფიქრობ, ის გადაწყვეტილება, რომელიც გუშინ მიიღო პრემიერ-მინისტრმა, კარნახით არის მიღებული და ეს შეთანხმებული იყო ბიძინა ივანიშვილთან“, - აცხადებს დუმბაძე.

დუმბაძის თქმით, მისი გათავისუფლების ერთ-ერთი მთავარი მიზეზი, აზიზიეს მეჩეთი გახდა.

„ნახევარი წლის განმავლობაში ყოფილი პრემიერი არ მელაპარაკებოდა, იმიტომ რომ აზიზიეს მეჩეთზე ჩვენ ვერ შევთანხდით. ბიძინა ივანიშვილთან პირველ შეხვედრაზე მე ამ თემაზე ვილაპარაკე, რომ მჭირდებოდა მისგან მხარდაჭერა, ისე მე ამ გუნდში არ მივიდოდი. ჩემთვის ეს მეჩეთი არის ყველაზე მნიშვნელოვანი თემა და არამარტო ჩემთვის, არამედ მთელი აჭარისათვის“, - აცხადებს დუმბაძე.