სახელმწიფო დეპარტამენტის გზავნილი აუცილებლად აისახება პოლიტიკურ ცხოვრებაზე

სახელმწიფო დეპარტამენტის გზავნილი აუცილებლად აისახება პოლიტიკურ ცხოვრებაზე - ბაჩუკი ქარდავა

პოლიტიკა - 23:05, 13 Sep, 2014

2306

აშშ-ს სახელმწიფო დეპარტამენტის მიერ საქართველოს მისამართით გაკეთებულ განცხადებას აფასებს არასაპარლამენტო ოპოზიცია. ბაჩუკი ქარდავა მიიჩნევს, რომ ეს არის მკაფიო სიგნალი იმისა, რომ დროა საქართველოს ხელისუფლებამ უკან გახედვასა და წარსულზე აპელირების ნაცვლად, აქცენტი უფრო მეტად ქვეყნის განვითარებასა და იმ გამოწვევებზე გაამახვილოს, რომელიც საქართელოს წინაშე დგას.

,,რატომღაც ასეა მიღებული - მტერს, რომელიც გვიპყრობს ვეფერებით და მის განცხადებებს პოზიტივით და გახარებული ვიღებთ, ხოლო მეგობრის რჩევებს, რომელ მეგობარზეც არის დამოკიდებული ჩვენი უსაფრთხოება, მისას მტრობად ვაფასებთ. ეს უნდა შეიცვალოს და შეიცვლება იმ შემთხვევაში, თუ ჩვენი ქვეყნის ხელისუფლება გაიხედავს უფრო მეტად წინ“, - აცხადებს ბაჩუკი ქარდავა. მისივე თქმით, ეს რომ კრემლის განცხადება ყოფილიყო ,,ალბათ აბაშიძე მინიმუმ უკვე აეროპორტში იქნებოდა, კარასინთან შესახვედრად მომზადებული“.

რაც შეეხება სახელწიფო დეპარტამენტის განცხადებას, ევროატლანტიკური ძალების კონსოლიდაციის შესახებ, ბაჩუკი ქარდავა მიიჩნევს, რომ გარდაუვლად აუცილებელია ქვეყანაში არსებული ყველა იმ ძალის კონსოლიდაცია, რომელიც ქვეყნის მომავალს ნატოში ხედავს.

,,მიმაჩნია, რომ საქართველოს განვითარება უნდა მოხდეს ევროატლანტიკურ სტრუქტურებში ინტეგრირებით, ეს არის ჩვენი უსაფრთხოების გარანტი აგრესორ რუსეთისგან თავის დასაცვად. შესაბამისად, მიუხედავად სიმპათია ანტიპათიისა, აუცილებელია მოხდეს დასავლეთზე ორიენტირებული ძალების კონსოლიდაცია, იქნება ეს ოპოზიციასა თუ ხელისუფლებაში. სწორედ ამ კუთხითაც არის მნიშვნელოვანი აშშ-ს სახელმწიფო დეპარტამენტის განცხადება და არ მახსენდება, როდესმე ასეთ პრაქტიკულ ნაბიჯზე გაეკეთებინოთ მათ აქცენტი საქართველოსთან მიმართებაში, მითუფრო, რეგიონული გამოწვევებისა და საფრთხეების კონტექსტში. ეს მკაფიო გზავნილია, რომელიც აუცილებლად მოახდენს საქართველოს პოლიტიკურ ცხოვრებაზე გავლენას“, - განაცხადა ბაჩუკი ქარდავამ.