ოკუპირებულ აფხაზეთში მე-6 საუკუნის დრანდის ტაძარს ევრორემონტს უტარებენ

პოლიტიკა - 18:04, 13 Sep, 2014

2792

ოკუპირებულ აფხაზეთში, სოფელ დრანდაში მდებარე საკათედრო ტაძარის რესტავრაცია არქიტექტორებისა და ისტორიკოსების თანხმობის გარეშე მიმდინარეობს. ,,იმედის“ მიერ მოპოვებულ ვიდეო-მასალაში იტორიკოსი ირწმუნება, რომ ადგილზე მიმდინარეობს სამუშაოები სრული კანონდარღვევით. მისი თქმით, ამ ტერიტორიაზე არასოდეს გამოჩენილან არც ისტორიკოსები და არც არქეოლოგები. 3 წელია ისტორიულ ძეგლს რესტავრაცია უკანონოდ უტარდება.

,,გარე პერიმეტრზე მიმდინარეობს სამუშაოები. 400 კვ.მეტრამდე მიწა არის მოჭრილი. არქეოლოგებისა და ისტორიკოსების დაკვირვების გარეშე. ადგილზე აშენებულია თანამედროვე სატრაპეზო. კანონი ისტორიული და კულტურული მემკვიდრეობის შესახებ და ასევე საერთაშორისო პრაქტიკა ისტორიულ ძეგლებზე მსგავსი სამუშაოების ჩატარების უფლებას არ იძლევა. ამ ყველაფერს დიდი დანაკარგი მოჰყვება. მე ვუხსნიდი, რომ არაფერით არ შეიძლება დიდი რაოდენობით ცემენტის გამოყენება“, - აცხადებს აფხაზეთში მცხოვრები ისტორიკოსი.

,,აბსოლუტურად აგრესიული მასალა შემოიტანეს. თამამად შეიძლება ითქვას, რომ დაზიანებულია არქეოლოგიური ფენა. ნებისმიერი სამუშაო აფხაზეთში კულტურული მემკვიდრეობის ძელგლებზე რაც ტარდება არის ყველა უკანონო, რადგან ისინი შეთანხმებული არ არის საქართველოს კულტურული მემკვდრეობის სააგენტოსთან“, - აცხადებს ისტორიკოსი გიორგი გაგოშიძე.