საქართველოს პრეზიდენტის თქმით, ექს-პრემიერი ბიძინა ივანიშვილი ცალმხრივ ინფორმაციებს იღებს. ამის შესახებ გიორგი მარგველაშვილმა ბიძინა ივანიშვილის ინტერვიუს კომენტირებისას განაცხადა. ის არ ეთანხმება ივანიშვილის განცხადებას, რომ საქართველო საპარლამენტო რესპუბლიკაა.

„საქართველო ნახევრად საპარლამენტო რესპუბლიკაა, რომელსაც ჰყავს ხალხის მიერ არჩეული პრეზიდენტი. საპარლამენტო რესპუბლიკებში პრეზიდენტებს ჩვეულებრივ ნიშნავენ", - განაცხადა მარგველაშვილმა.

ყოფილმა პრემიერმა ბიძინა ივანიშვილმა „კვირის პალიტრასთან“ ექსკლუზიურ ინტერვიუში საუბრისას გიორგი მარგველაშვილი მთავრობასთან „არაჯანსაღ კონკურენციაში“ დაადანაშაულა. რაც შეეხება გაერო-ს სამიტზე გასამგზავრებელ დელეგაციას, ექს-პრემიერი ამბობს, რომ გაერო-ს სამიტზე წასვლა პრემიერ-მინისტრის პრეროგატივაა.

მისი თქმით, საქართველო უკვე საპარლამენტო რესპუბლიკაა და კითხვა, თუ ვინ უნდა წავიდეს გაერო-ში, არ არსებობს.