ექსპერტი კახი კახიშვილი, ექს-პრემიერის, ბიძინა ივანიშვილის ინტერვიუს და გაერო-ში ქართული დელეგაციის გამგზავრებასთან არსებულ გაუგებრობას აფასებს.

როგორც „ნიუპოსტთან“ საუბარში კახი კახიშვილი ამბობს, გაერო-ში წასვლის თემა განხილვის საგანი არც უნდა ყოფილიყო, მითუმეტეს არასწორია ამით მოსახლეობის გადაღლა.

„ასეთი საკითხებით მოსახლეობის გადაღლა არასწორია. მოსახლეობა ისედაც რთულ სოციალურ პირობებშია და ყოველდღიურად იმაზე საუბარი, თუ ვინ სად წავა და ვინ რას მოაწერს ხელს, გამაღიზიანებელია მოსახლეობისთვის. ამიტომ, ყველა სახელმწიფო ინსტიტუციამ უნდა გააკეთოს ის, რა ამოცანის წინაშეც დგას იმ კომპეტენციის ფარგლებში, რომელიც გაწერილია კანონმდებლობით. თუ არსებობს რაღაც საკითხები, რომელთა გადაწყვეტილების წინაც საჭიროა საკონსულტაციო ჯგუფი, სადაც პრემიერის და პრეზიდენტის წარმომადგენლები შევლენ, რომლებიც მანამდე განიხილავენ სამივლინებლო საკითხებს, რომ არ გადაღალონ მოსახლეობა აღნიშნულზე საუბრით“, - აცხადებს კახიშვილის.

რაც შეეხება ექს-პრემიერის ინტერვიუს, კახიშვილის თქმით, ბიძინა ივანიშვილმა თქვა ის რასაც ფიქრობდა და ეს ჩვეულებრივი ამბავია.

„ბიძინა ივანიშვილი არის მოქალაქე და შეფასებებში თავისუფალია. ამას ჩვეულებრივ მოვლენად ვაფასებ, რადგან გიორგი მარგველაშვილი ვერ გახდებოდა პრეზიდენტი, რომ არა ბიძინა ივანიშვილი, ირაკლი ღარიბაშვილი ვერ გახდებოდა პრემიერი, რომ არა ივანიშვილი და მის გარეშე ვერც საპარლამენტო უმრავლესობაში მოვიდოდნენ ისინი, ვინც დღეს არიან. მეტიც, რომ არ ყოფილიყო ბიძინა ივანიშვილი „ნაციონალური მოძრაობის“ ხელისუფლებიდან მოშორება ცოტა რთული პერსპექტივა იქნებოდა. ამ ადამიანს აქვს ავტორიტეტი საზოგადოებაში და მის სიტყვას და შეფასებას დიდი მნიშვნელობა. თქვა ის რასაც ფიქრობდა“, - აცხადებს კახიშვილი.

რაც შეეხება პრეზიდენტსა და მთავრობას შორის არსებულ კონფლიქტს, კახიშვილის თქმით, ფაქტია, რომ მათ კარგი ურთიერთობა არ აქვთ.

„რა თქმა უნდა „ნაციონალურ მოძრაობას“ აწყობს პრეზიდენტის და მთავრობის კონფლიქტი. რაც უფრო მეტი პრობლემა შეექმება ქართულ ოცნებას რა თქმა უნდა ეს შედის „ნაციონალური მოძრაობის“ პოლიტიკურ ინტერესებში. ფაქტია, რომ მთავრობას და პრეზიდენტს კარგი მეგობრული ურთიერთობა არ აქვთ, თუმცა არც უნდა ჰქონდეთ. მთავარია ინსტიტუციების მუშაობა შედეგისთვის. ვის რა პიროვნული ურთიერთობა აქვს ეს მოსახლეობისთვის საინტერესო არ არის“, - აცხადებს კახიშვილი.

ყოფილმა პრემიერმა ბიძინა ივანიშვილმა „კვირის პალიტრასთან“ ექსკლუზიურ ინტერვიუში საუბრისას გიორგი მარგველაშვილი მთავრობასთან „არაჯანსაღ კონკურენციაში“ დაადანაშაულა. მისი თქმით, კონფლიქტი მთავრობასა და პრეზიდენტს შორის „ნაციონალურ მოძრაობას“ აწყობს. რაც შეეხება გაერო-ს სამიტზე გასამგზავრებელ დელეგაციას, ექს-პრემიერი ამბობს, რომ გაერო-ს სამიტზე წასვლა პრემიერ-მინისტრის პრეროგატივაა.

რაც შეეხება გაერო-ში ვიზიტს, ცოტა ხნის წინ პრეზიდენტმა განაცხადა, რომ მისი აშშ-ში ვიზიტი ჩაიშალა.