აჭარის მთავრობის თავმჯდომარე არჩილ ხაბაძე ქობულეთში მომხდარ ინციდენტს ეხმაურება და ამბობს, რომ ეს მისთვის ყოვლად მიუღებელია.

მისი თქმით, გუშინდელი ფაქტი იყო პროვოცირებული იმ ძალების მიერ, რომლებსაც ნებისმიერი ხერხით ქვეყანაში დესტაბილიზაცია სურს.

„გუშინ ქობულეთში მომხდარი ინციდენტი ჩემთვის ყოვლად მიუღებელია. აჭარა ყოველთვის იყო ერთ-ერთი ყველაზე მრავალეროვანი რეგიონი საქართველოში და გამოირჩეოდა რელიგიური მრავალფეროვნების მიმართ შემწყნარებლობით. ამიტომაც სრული პასუხისმგებლობით ვაცხადებ, რომ გუშინდელი ფაქტი იყო პროვოცირებული იმ ძალების მიერ, რომლებსაც ნებისმიერი ხერხით ქვეყანაში დესტაბილიზაცია სურს.

ძალიან მრცხვენია და ვგმობ იმას, რაც გუშინ მოხდა. ქართველი მუსლიმები და ქრისტიანები საუკუნეების განმავლობაში ერთად მშვიდობიანად ვცხოვრობდით, რაშიც ჩვენი ქვეყნის და ერთმანეთის მიმართ სიყვარული გვეხმარებოდა. მე მივმართავ ყველას, რომ არ აყვნენ ამ პროვოკაციას“, - აცხადებს ხაბაძე.