ფინანსთა მინისტრი ნოდარ ხადური პროკურატურაში გაცემულ პრემიებთან დაკავშირებით გავრცელებულ ინფორმაციას ეხმაურება.

მისი თქმით, არც ერთი მაღალი პრემია არ არის გაცემული, მათ შორის პროკურატურაში.

ხადურის თქმით, ფინანსთა სამინისტრო აღნიშნულთან დაკავშირებით სიტუაციას აკონტროლებს.

„არც ერთი განსაკუთრებით მაღალი პრემია არ არის გაცემული, მათ შორის არც პროკურატურაში. მინდა გითხრათ, რომ ჩვენ ვაკონტროლებთ ამ სიტუაციას. როცა ჯამურ ციფრს ვაცხადებთ, ჯამურმა ციფრმა მართლაც შესაძლოა გამოიწვიოს გარკვეული უკმაყოფილება. როდესაც ვამბობთ, რომ 12-მა თანამშრომელმა 12 თვის განმავლობაში მიიღო ნახევარი მილიონი, ეს თვეში გამოდის 3 ათასი ლარი, რაც ხელზე ასაღებად 2 400 ლარს შეადგენს. ასე რომ, კარგი იქნება თუ კონკრეტულად ვიტყვით ერთმა ადამიანმა რამდენი აიღო", - განაცხადა ხადურმა.

IDFI-ის ინფორმაციით, 2013 წელს პრემიის სახით მთავარი პორკურატურის თანამდებობის პირებმა 1 646 027 ლარი მიიღეს, ხოლო 2014 წლის პირველი 6 თვის განმავლობაში - 852 731 ლარი.