„ნაციონალურ მოძრაობაში“ შს მინისტრის საგაზეთო ინტერვიუს ეხმაურებიან და მისი მხრიდან მიხეილ სააკაშვილის მიმართ წაყენებულ ბრალდებებს აბსურდულს უწოდებენ. ისინი განმარტავენ, რომ მინისტრს ამ განცხადებით კრიმინოგენული ვითარების გადაფარვა სურს.

„ფაქტია შინაგან საქმეთა მინისტრს ჩვევად ექცა, რომ ასეთ სიტუაციაში, როდესაც მის მიმართ საზოგადოების მხრიდან კრიტიკა იზრდება, იგი იწყებს ჭორაობას. ეს ახალი გასართობი აქვს. საბურავები ხომ აღმაჩინა და ეხლა ალბათ რაღაც ახალს მიაგნო. არ არის პრობლემა. ჭიკაიძეს რომ ვაკვირდებით, ცოტა ხანი ითამაშებს ამ თემით და შემდეგ გამოუძებნიან სხვა გასართობს“, - განაცხადა უმცირესობის წევრმა გოგა ხაჩიძემ.

ალექსანდრე ჭიკაიძე აცხადებს, რომ საქართველოს ექსპრეზიდენტმა მიხეილ სააკაშვილმა “ერთიანი ნაციონალური მოძრაობის” წევრებს და არასამთავრობო ორგანიზაციების ლიდერებს დაავალა შექმნან ჯგუფები, რომლებმაც პროვოკაციულად უნდა იმოქმედონ.