საქართველოს პრეზიდენტი გიორგი მარგველაშვილი სამინისტროებს საკუთარ ვალდებულებებს ახსენებს. აღნიშნულთან დაკავშირებით მარგველაშვილმა გადაცემა „არჩევანში“ გაერო-ს სამიტზე გასამგავრებელ დელეგაციაზე კომენტირებისას განაცხადა.

მისი თქმით, სამიტზე გამგზავრების თემას მისი პირდაპირი მოვალეობის ჭრილში განიხილავს.

„მე მინდა ჩემი პირდაპირი მოვალეობის ჭრილში განვიხილო ეს თემა. როდესაც პრეზიდენტი იღებს მიწვევას საკუთარ სახელზე პრეზიდენტის საქმეა უპასუხოს მას და არა სხვა უწყებების. პრეზიდენტს გააჩნია შესაბამისი უნარი წერილის დაწერის და პასუხის გაცემის. დარწმუნებაც აბსოლუტურად მისაღებია, მაგრამ ეს უნდა მოხდეს მანამ სანამ პასუხი გაეცემა ამ მიწვევას. ჩემს მიერ წასულ კომიუნიკაციას არ აქვს შესაბამისი მხარდაჭერა საგარეო საქმეთა სამინისტროდან. მნიშვნელოვანია გავიაზროთ, რომ ყველა უწყება არის არა მთავრობის სამინისტრო, არამედ საქართველოს სამინისტრო. შესაბამისად ის ვალდებულებები რაც მათ გააჩნიათ, გააჩნიათ არა მხოლოდ მთავრობის მიმართ, არამედ ზოგადად გააჩნიათ ვალდებულებები, მათ შორის პრეზიდენტის საგარეო კომუნიკაციის ეფექტური უზრუნველყოფისთვის. ჩვენი სამინისტროები ემსახურება არა მთავრობას არამედ სახელმწიფოს. მე ამით ვამბობ იმას, როგორც უნდა იყოს. მე და ჩემი კოლეგები არ ვიშურებთ დროს და ენერგიას რომ ეს ინფორმაცია ჩვენ კოლეგებს გაუზიაროთ სამინისტროებში, რომ მათ გააჩნიათ ვალდებულება არა მხოლოდ მთავრობის მიმართ არამედ სახელმწიფოს მიმართ. სახელმწიფო მეთაური პრეზიდენტია. შესაბამისად თუ პრეზიდენტი აგზავნის წერილს, ეს წერილი უნდა მივიდეს დროზე, თუ პრეზიდენტს უგზავნიან წერილს - ეს წერილი უნდა მოვიდეს დროზე“, - განაცხადა მარგველაშვილმა.