პარლამენტის საგარეო ურთიერთობათა კომიტეტის თავმჯდომარემ თედო ჯაფარიძემ ირანში გამართული ვიზიტი შეაფასა. მისი თქმით, საბოლოო ჯამში ვიზიტი რთული და საინტერესო გამოდგა.

ირანში ჯაფარიძესთან ერთად დიასპორისა და კავკასიის საკითხთა კომიტეტის ხელმძღვანელი გუბაზ სანიკიძე იმყოფებოდა.

"მინდა გითხრათ, რომ ამ მხრივ, ჩვენი მცდელობების მიუხედავად, ვერ შევძელით მოგვეპოვებინა სათანადო ინფორმაცია იმ უწყებებიდან, რომლებიც უშუალოდ ამ საკითხებით არიან დაკავებული. კარგი იქნება, თუკი შემდეგი ვიზიტების დროს პარლამენტის წევრები ამ ქვეყანაში სათანადოდ აღჭურვილნი წავლენ, რადგან მათ არა მხოლოდ საპარლამენტო ურთიერთობებზე ექნებათ საუბარი, არამედ თემებზე, რომელიც ეხება ვაჭრობას, ეკონომიკას, კონკრეტულ პროექტებს, ენერგოუსაფთხოებას და ასე შემდეგ", - განაცხადა ჯაფარიძემ ბიუროს სხდომაზე.

ჯაფარიძის ცნობით, ირანის პარლამენტში გამართულ შეხვედრებზე საუბარი შეეხო ორმხრივ ურთიერთობებს, რეგიონში მიმდინარე მოვლენებს, ურთიერთობებს რუსეთთან.

მისივე თქმით, "იყო რთული და ხისტი შეხვედრა ირანის უშიშროების საბჭოს ხელმძღვანელის მოადგილესთან".

"შეხვედრა დიდ პოლემიკაში არ გადაზრდილა, მაგრამ ყველაფერი შეგვახსენეს და არც ჩვენ დავრჩით ვალში. შეგვახსენეს ისიც, რომ ჩვენ თავის დროზე – რაც არ ვიცოდი, ირანელი მეცნიერი დავაკავეთ, რომელიც ამერიკელებს გადავეცით და შემდეგ ამერიკელებმა დააბრუნეს", – განაცხადა ჯაფარიძემ.

გუბაზ სანიკიძემ საქართველოს ირანთან ურთიერთობის მნიშვნელობას გაუსვა ხაზი და აღნიშნა, რომ საქართველოს ირანთან ურთიერთობა ძალიან სჭირდება.

"ჩვენ ცხრა წლის განმავლობაში ირანთან არანაირი – არც სერიოზული და არც არასერიოზული ურთიერთობა არ გვქონია. მინდა გაუწყოთ, რომ ბოლოდროინდელი მოვლენების გამო ირანის გავლენები იზრდება - განსაკუთრებით ერაყში მიმდინარე მოვლენების შემდეგ", - განაცხადა გუბაზ სანიკიძემ.

დეკემბერში, ირანში ჩასვლას აპირებს პარლამენტის თავმჯდომარე დავით უსუფაშვილი.