„თბილსერვის ჯგუფის“ ხელმძღვანელმა საკრებულოს სამსახურში არსებული მდგომარეობა გააცნო

პოლიტიკა - 18:39, 08 Sep, 2014

2046

საკრებულოში ურბანული დაგეგმარებისა და საქალაქო მეურნეობის კომისიის სხდომა გაიმართა. სხდომაზე შპს „თბილსერვის ჯგუფის“ ხელმძღვანელმა, გიორგი ბაგრატიონმა კომისიის წევრებს სამსახურში არსებული მდგომარეობა გააცნო და სამომავლო გეგმების შესახებ ანგარიში წარუდგინა.

კომისიის სხდომას თბილისის მერის მოადგილე გიორგი სოლომონია და კეთილმოწყობის საქალაქო სამსახურის უფროსი ავთანდილ სუდაძე ესწრებოდნენ.

შეხვედრაზე სამსახურის ხელმძღვანელმა აღნიშნა, რომ შპს „თბილსერვის ჯგუფში“ მთელი რიგი პრობლემები დახვდა. უწყებაში არსებობდა ე.წ. „სამეურვეო საბჭოები“, სადაც დასაქმებული იყო ბევრი ადამიანი, რომლებიც აზღაურებას იღებდნენ, თუმცა, არანაირ სამუშაოს არ ასრულებდნენ. გიორგი ბაგრატიონის თქმით, სამსახურში არიან, ასევე, თანამშრომლები, რომლებიც ეფექტურად ვერ მუშაობენ.

ბაგრატიონის განცხადებით, არსებობს პრობლემები, რაც დაუყოვნებლივ გადაჭრას საჭიროებს. მაგალითად, სრულიად მოძველებული, მწყობრიდან გამოსული ტრანსპორტი, რომელიც ქალაქს ემსახურება.

„საჭიროა ახალი ტრანსპორტის შემოყვანა ქალაქში, რომ დასუფთავების კუთხით სამუშაოების შესრულება უფრო ხარისხიანად და ეფექტურად მოხდეს. ასევე, ძალიან მნიშვნელოვანი პრობლემაა ისიც, რომ დედაქალაქში არ არის საკმარისი ურნები. ამჟამად გამოცხადებულია ტენდერი და უახლოეს მომავალში პრობლემა მოგვარებული იქნება. თბილისის მასშტაბით, ყველა იმ ტერიტორიაზე, სადაც მოსახლეობის მოთხოვნა არსებობს, დამატებითი ურნები დამონტაჟდება", - განაცხადა გიორგი ბაგრატიონმა.

კომისიის სხდომაზე ბაგრატიონი მოსახლეობისთვის ყველაზე მწვავე პრობლემას - ლილოში განთავსებული ნარჩენების პოლიგონის საკითხსაც შეეხო. მისი თქმით, განიხილება გადამამუშავებელი ქარხნის მშენებლობა, რომელიც ევროპული სტანდარტების შესაბამისად აშენდება. ამ ეტაპზე მიმდინარეობს ინვესტორების მოძიება.

„ასევე, იგეგმება ახალი პოლიგონის მშენებლობა, რომლისთვისაც 86 ჰექტარი ფართობი ტერიტორიაა საჭირო. ამ ეტაპზე ეკონიმიკის სამინისტროსთან ერთად ტერიტორიის შერჩევა მიმდინარეობს,“ - განაცხადა ბაგრატიონმა. მისი თქმით, შპს “თბილსერვის ჯგუფის“ თანამშრომლებისთვის სამუშაო პირობები მაქსიმალურად გაუმჯობესდება. იგეგმება მეეზოვეების ფორმების შეცვლაც.