პარლამენტის თავმჯდომარემ ბიუროს სხდომაზე მანდატურებს ჯოხების გამოყენებისკენ მოუწოდა. დავით უსუფაშვილის გაბრაზება დეპუტატების უყურადღებობამ გამოიწვია.

უსუფაშვილი საორგანიზაციო საკითხებთან დაკავშირებზე საუბრობდა, რა დროსაც გოგი თოფაძე და კახა ოქრიაშვილი ერთმანეთს ესაუბრებოდნენ. პარლამენტის თავმჯდომარემ დეპუტატებს სთხოვა, საუბარი შეეწყვიტათ, თუმცა უშედეგოდ.

"თქვენ დასაჯდომად არ შემოსულხართ. თუ პატივისცემა არ აქვთ ხალხის, ავიღოთ ჯოხი და ამით ვიმუშაოთ", - მიმართა უსუფაშვილმა მანდატურის თანამშრომლებს.

ბიუროს სხდომა 30 წუთის დაგვიანებით დაიწყო. ამის გამო უსუფაშვილმა დეპუტატებს მოუწოდა, საკუთარ კალენდარში მოინიშნონ, რომ ბიუროს სხდომა 15:00 საათზე დაიწყება.