აჭარის უმაღლეს საბჭოსა და არჩილ ხაბაძეს შორის დაპირისპირება ახალ ფაზაში შედის. ფრაქცია „ქართული ოცნების“ დეპუტატები დახურულ სხდომაზე შეიკრიბნენ და გადაწყვიტეს, რომ დაიწყება მზადება იმპიჩმენტის პროცედურისთვის, უმრავლეობის მეორე ნაწილი კი მათ არ ეთანხმება. თავად ხაბაძეს კი კომენტარი არ გაუკეთებია.

არაეფექტური საკადრო პოლიტიკა, ბიუჯეტის ხარჯვითი ნაწილის შეუსრულებობა, კორუფციული გარიგებები, ეს არის იმ მძიმე ბრალდებათა ნაწილი რომელიც აჭარის მთავრობის თავმჯდომარის არჩილ ხაბაძის წინააღმდეგ დღეს უმაღლესი საბჭოს ფრაქცია „ქართული ოცნების“ წევრებმა გააჟღერეს. ისინი ამტკიცებენ, რომ ხაბაძის იმპიჩმენტის დასაწყებად საკმარისი არგუმენტები გააჩნიათ. სწორედ იმპიჩმენტზე სამსჯელოდ შეიკრიბა ფრაქცია დახურულ სხოდმაზე, სხდომის დასრულების შემდეგ ფრაქციის თავმჯომარემ განაცხადა, რომ მათი სრული შემდგენლობა, ანუ შვიდივე დეპუტატი მზად არის მხარი დაუჭიროს პროცესის დაწყებას. ინიციატივის წარსადგენად უმაღლეს საბჭოში, სწორედ 7 დეპუტატის ხელომწერაა საჭირო.

„მე ფრაქციის წევრებთან დავდე ის არგუმენტები, რომელებსაც მე ვთვლიდი რომ იყო საფუძველი იმისა დაგვეწყო მთავრობისთვის უნდობლობის გამოცხადება, იყო კამათი და აზრთა სახვადასხვაობა. ჩემთვის მთავარია გადადგეს აჭარის მთავრობა, ეს მოხდება იმპიჩმენტის საფუძველზე“,- განაცხადა „ქართული ოცნების“ წევრმა ალექსანდრე ჩიტიშვილმა.

არჩილ ხაბაძისადმი უნდობლობის გამოცხადებას არ ეთანხმება ფრაქცია "ქართული ოცნება - აჭარას" წევრი დავით ბაციკაძე.

მისივე თქმით, მას საფუძველი არ აქვს არჩილ ხაბაძის მუშაობას უნდობლობა გამოუცხადოს.

"თუკი არგუმენტები არსებობდა, ამდენი ხნის განმავლობაში, მეც უნდა მცოდნოდა. ორი დღის განმავლობაში არ მომისმენია რაიმე სერიოზული არგუმენტები იმის შესახებ, თუ რა პრეტენზიები ჰქონდათ უმაღლეს საბჭოს უმრავლესობის წევრებს მთავრობის თავმჯდომარის მუშაობასთან დაკავშირებით. ცალსახად ვიმეორებ, რომ უმაღლესი საბჭოს იმ წევრების ჯგუფს არ გამოუვა არაფერი "ნაციონალურ მოძრაობასთან" თანამშრომლობის გარეშე, რადგან მე და ჩემი თანაფრაქციელები არ ვაპირებთ იმპიჩმენტში მონაწილეობას. ფრაქცია "ქართულმა ოცნებამ" აიღოს პასუხისმგებლობა "ნაციონალურ მოძრაობასთან" ერთად იმ საკითხებზე რასაც ამის შემდეგ ჩაიდენენ", - აღნიშნა დავით ბაციკაძემ.