ექსპერტები ნატო უელსის სამიტის დეკლარაციის 31-ე მუხლის ბუნდოვანებაზე საუბრობენ და მას ქართული დიპლომატიის მარცხად აფასებენ.

აღნიშნულ მუხლში ნათქვამია, რომ გაჭიანურებული კონფლიქტები კვლავაც რჩება შეშფოთების საგნად, რომელიც ძირს უთხრის რეგიონის მოქალაქეების შესაძლებლობას, მიიღონ სრული პოტენციალი, როგორც ევროატლანტიკური საზოგადოების წევრებმა.

ესქპერტი ელენე ხოშტარია აღნიშნული საკითხის კომენტირებისას ამბობს, რომ ეს ბუნდოვანება უნდა მოიხსნას და ფორმულირება ჩვენს სასარგებლოდ გაკეთდეს.

„ახლა ჩვენი ამოცანაა, რომ დიპლომატიამ იმუშაოს და ჩვენი მეგობრების მეშვეობით გაირკვეს, ზუსტად რა იგულისხმება ამ ჩანაწერში. რამდენად იგულისხმება საქართველოს კონფლიქტი და ვიმუშაოთ, რომ ეს ბუნდოვანება მოიხსნას და შეიცვალოს ფორმულირება. იმიტომ, რომ აქამდე ნატოს მიერ გადადგმული ნაბიჯი საპირისპიროს ამტკიცებდა“, - აცხადებს ელენე ხოშტარია.

აღნიშნულ მუხლთან დაკავშირებით, განმარტება სოციალური ქსელის მეშვეობით ნატოს სპეციალურმა წარმომადგენელმა კავკასიასა და ცენტრალურ აზიასა ჯეიმს აპატურაიმ გააკეთა.

„ტექსტი შეგნებულად მიანიშნებს „მოქალაქეებზე“ - მათი გადაადგილების, ვაჭრობის და კეთილდღეობის თავისუფალ შესაძლებლობებზე. ის შეგნებულად არ იყენებს ტერმინს „სახელმწიფოები“, იმიტომ, რომ ნატო არ ეთანხმება მოსაზრებას, რომ მესამე მხარეს შეუძლია შეწყვიტოს გაფართოების პროცესი კონფლიქტის შექმნით ან გაყინვით. ასპირანტი ქვეყნები შეფასდებიან მათი რეფორმებით, თავიანთი და ნატპოს მზადყოფნით - ეს ნათელი და მარტივია“, წერს აპატურაი „ფეისბუქის“ საკუთარ გვერდზე.

წყარო: გაზეთი "რეზონანსი"