2008 წელს სწორედ აშშ იყო პირველი სახელმწიფო რომელმაც შეაჩერა რუსული აგრესია

2008 წელს სწორედ აშშ იყო პირველი სახელმწიფო რომელმაც შეაჩერა რუსული აგრესია - ირაკლი ალასანია

პოლიტიკა - 15:13, 07 Sep, 2014

1653

ჩვენთან არის ლიდერი, რომელსაც საკუთარი ქვეყნისთვიის ბრძოლაში ჭრილობები აქვს მიღებული და ყველას, ვისაც ომი გამოგვივლია და ასეთი ბევრია საქართველოში, ვიღებთ მას როგორც საკუთარ თანამებრძოლს, - ამის შესახებ საქართველოს თავდაცვის მინისტრმა ირაკლი ალასანიამ ამერიკის შეერთებული შტატების თავდაცვის მდივანთან ერთობლივი პრეს-კონფერენციაზე განაცხადა.

“ჩემთვის არის გამორჩეული პატივი, რომ დღეს საქართველოში მივესალმოთ ჩვენი ქვეყნის ყველაზე გამორჩეული, ყველაზე ძლიერი და კარგი მეგოობრის ამერიკის შეერთებული შტატების თავდაცვის მდივანს, ბატონ ჩაკ ჰეგელს. საქართველო - ამერიკის ურთიერთობები ბოლო 20 წლის განმავლობაში სულ უფრო ძლიერდებოდა და ყოვლისმომცველი ხდებოდა. ჩვენ ერთად ბევრი საერთაშორისო ოპერაციის მონაწილე ვართ - ვიყავით ერთად ერაყში, დღესაც ერთად ვიცავთ ავღანეთისა და ევროატლანტიკური სივრცის უსაფრთხოებას. მე მინდა აღვნიშნო, რომ ის ნდობა, რომელიც არის ჩვენს სამხედროებს შორის, ჩვენს გმირ ჯარისკაცებს შორის არის ძალიან დიდი. აქედან გამომდინარე, სხვა უფლება არ გვაქვს პოლიტიკურ ლიდერებს თუ არა უფრო დავაახლოოთ ორი ქვეყანა ერთმანეთთან. ჩვენ გვაქვს სტრატეგიული პარტნიორობა და საქართველო ამერიკის შეერთებული შტატების მიერ განხილულია როგორც ყველაზე სანდო მოკავშირე და პარტნიორი.

ჩვენ ერთად ვიყავით ნატოს სამიტზე, სადაც ნატომ ამერიკის შეერთებული შტატების უშუალო მხარდაჭერით მიიღო გადაწყვეტილებები და საქართველო გახდა კიდევ ერთი ახალი, ყველაზე უფრო თავსებადი ლიგაში.

მე მინდა განსაკუთრებული დამოკიდებულება გამოვხატო თავად ბატონი თავდაცვის მდივნის მიმართ. ჩვენთან არის ლიდერი, რომელსაც საკუთარი ქვეყნისთვიის ბრძოლაში ჭრილობები აქვს მიღებული და ყველას, ვისაც ომი გამოგვივლია და ასეთი ბევრია საქართველოში, ვიღებთ მას როგორც საკუთარ თანამებრძოლს“, - განაცხადა ალასანიამ.

მინისტრის თქმით, თავდაცვის მდივანთან საუბარი შეეხო უკრაინაში შექმნილ ვითარებას, რუსულ აგრესიას, რომელიც საფრთხეს უქმნის მთლიანად ევროატლანტიკურ, ევროპულ და უშუალოდ საქართველოს უსაფრთხოებას.

,,შევთანხმდით, რომ ერთობლივად, კოორდინაციაში ვიმოქმედებთ იმისთვის, რომ ჩვენს მოძმე უკრაინელ ხალხს აღმოვუჩინოთ ყველა დახმარება, რაც მათ სჭირდებათ.

ჩვენ, რა თქმა უნდა, მივესალმებით იმ მიღწეულ შეთანხმებას, რომ შეწყდეს ცეცხლი და ვიმედოვნებთ, რომ მომავალში პროცესები განვითარდება მშვიდობიანი გზით“, - განაცხადა ალასანიამ და ხაზი გაუსვა აშშ-ს გადაწყვეტილებისადმი საქართველოს მხრდაჭერას ერაყში მშვიდობისა და სტაბილურობის დამყარებისთვის.

,,ჩვენ ვისაუბრეთ ერაყში შექმნილ ვითარებაზე. ის თუ რა ხდება დღეს ერაყში, არის საფრთხე არა მარტო ერაყელებისა და სირიელებისთვის, არამედ არის საფრთხე მთელი ჩვენი საზოგადოებისთვის, ევროატლანტიკური სივრცისთვის და მე მინდა ხაზგასმით ვთქვა, რომ საქართველო, როგორც ამერიკის შეერთებული შტატების სტრატეგიული პარტნიორი და საიმედო მოკავშირე, სრულად მხარს უჭერს ამერიკის შეერთებული შტატებისა და კოალიციის გადაწყვეტილებას - დაიწყოს სერიოზული ნაბიჯების გადადგმა ერაყში მშვიდობისა და სტაბილურობის დამყარებისთვის.

მინდა გითხრათ, რომ ყველა აღვიქვამთ იქ მიმდინარე მოვლენებს, როგორც საფრთხეს საკუთარი ქვეყნის მიმართ და ეს ბოროტება უნდა იქნას აღმოფხვრილი. ამაში, ამერიკის შეერთებულ შტატებს და, რა თქმა უნდა, ერაყელ ხალხს ექნება ჩვენი თანადგომის იმედი.

ასევე, ვისაუბრეთ ორმხრივი ურთიერთობების კიდევ უფრო განვითარებაზე, საქართველოს თავდაცვისუნარიანობის ამაღლებაზე და ის გაძლიერებული შესაძლებლობების პაკეტი, რომელიც ნატომ მიიღო ამერიკის შეერთებული შტატების ლიდერობით, იქნება განხორციელებული უახლოეს პერიოდში“, - განაცხადა ალასანიამ, რომელმაც მადლობა გადაუხადა ჰეგელს და აშშ-ს მთავრობას იმ თანადგომისათვის, რომელსაც შეერთებული შტატები საქართველოს მიმართ გამოხატავს. ამის მაგალითად ირაკლი ალასანიამ 2008 წლის აგვისტოს ომში ამერიკის მხარდაჭერა მოიყვანა.

,,მინდა გავიხსენო 2008 წელი, როდესაც საქართველო აგრესიის მსხვერპლი იყო, სწორედ, ამერიკის შეერთებული შტატები იყო პირველი ქვეყანა, რომელიც გვერდში დაგვიდგა და შეაჩერა აგრესია. მან, ასევე, გაიღო დიდი ფინანსური მხარდაჭერა საქართველოსთვის, ერთი მილიარდი დოლარი, რომელმაც ჩვენი ეკონომიკა იმ დროს გადაარჩინა“, - განაცხადა თავდაცვის მინისტრმა.