უელსში მიმდინარე ნატოს სამიტის ფარგლებში, საქართველოს თავდაცვის მინისტრი, ორმხრივ შეხვედრებს განაგრძობს. დღეს, ირაკლი ალასანიამ კანადისა და ფინეთის თავდაცვის მინისტრებთან რობერტ ნიკოლსონთან და კარლ ჰაგლუნდთან გამართა შეხვედრები.

საქართველოს თავდაცვის მინისტრმა, უცხოელ კოლეგებს, საქართველოს ევროატლანტიკურ სტრუქტურებში მისწრაფების მხარდაჭერისთვის მადლობა გადაუხადა. შეხვედრებზე განხილვის ერთ-ერთი მთავარი თემა საქართველოს ნატოში გაწევრიანების პერსპექტივები და „გაძლიერებული თანამშრომლობის“ პაკეტის მნიშვნელობა იყო, რომელსაც საქართველო უელსის სამიტის შედეგად მიიღებს. მხარეები რეგიონალური უსაფრთხოების საკითხებსა და უკრაინის კრიზისსაც შეეხნენ. საქართველოს თავდაცვის უწყების ხელმძღვანელმა კოლეგებს ნატოსა და ევროკავშირის ეგიდით მიმდინარე საერთაშორისო მისიებში საქართველოს კონტრიბუციის შესახებ მიაწოდა ინფორმაცია.

„დღეს მქონდა ორმხრივი შეხვედრები როგორც პრეზიდენტის ისე მინისტრების დონეზე. ჩემს ფინელ და კანადელ კოლეგებთან დავაყენე საკითხი, რომ ნატო-საქართველოს პაკეტის შესრულების კუთხით ჩაერთონ აქტიურად და მათ მიიღეს ეს წინადადებები. ასევე დაგეგმილია შეხვედრა შვედეთის თავდაცვის მინისტრთან. ერთსულოვანება არსებობს იმაში, რომ საქართველო გამორჩეული თავისი გამოცდილებით ნატო-სთან თანამშრომლობით. ამიტომ დღეს მოხდება ინაუგურაცია, დაიწყება ახალი ფორმატი, რომელიც არის გაძლიერებული შესაძლებლობების ქვეყნისთვის. მინდა გითხრათ, რომ საქართველო ასპირანტ ქვეყნებს შორის არის ერთადერთი, რომელიც ახალი ფორმატის ნაწილი გახდა. ეს მოგვცემს შესაძლებლობას, ჩავერთოთ იმ პროცესების დაგეგმარებაში, რომელშიც მხოლოდ წევრი ქვეყნები იყვნენ ჩართული. ეს არის კიდევ ერთი დასტური ნატოსგან, რომ საქართველო გაწევრიანების გზაზე დგას“, - განაცხადა ალასანიამ