ნატო-ს ლიდერები საქართველოსთვის გაძლიერებული თანამშრომლობის პაკეტის გადაცემაზე შეთანხმდნენ. ამის შესახებ ნატო-ს გენერალურმა მდივანმა ანდერს ფოგ რასმუსენმა უელსში გამართულ პრესკონფერენციაზე განაცხადა.

"შევთანხმდით საქართველოსთვის გაძლიერებული ზომების პაკეტის გადაცემაზე, რომელიც საქართველოს ნატო-ს წევრობისთვის მომზადებაში დაეხმარება. ამ ქვეყნების თხოვნის გათვალისწინებით, ნატო-ს ლიდერები შეთანხმდნენ საქართველოს, იორდანიისა და მოლდოვასთვის თავდაცვითი შესაძლებლობების შექმნის ინიციატივის გაფართოვებაზე“, - განაცხადა რასმუსენმა.

მისი თქმით, თითოეული ქვეყნის ნატო-ში წევრობა განიხილება მისი კონკრეტული მიღწევების საფუძველზე.

„არანაირ მესამე ქვეყნებს არ ექნებათ უფლება ნატო-ს გაფართოებაზე ვეტოს დადების. ყველა კანდიდატს მოუწევს კიდევ უფრო მეტი გააკეთოს სხვადასხვა სფეროში და ჩვენ უზრუნველყოფთ მათ იმ მხარდაჭერით, რომელსაც ისინი საჭიროებენ", - განაცხადა ანდერს ფოგ რასმუსენმა.