საქართველოს მთავრობამ რეპრესირებულთა შესახებ კანონში ცვლილებების პაკეტი დაამტკიცა

პოლიტიკა - 14:58, 05 Sep, 2014

2548

საქართველოს მთავრობამ „მოქალაქეთა პოლიტიკური რეპრესიების მსხვერპლად აღიარებისა და რეპრესირებულთა სოციალური დაცვის შესახებ“ საქართველოს კანონში ცვლილების პაკეტი დაამტკიცა. ცვლილებების პაკეტი დღეს გამართულ მთავრობის სხდომაზე იუსტიციის მინისტრმა წარადგინა.

თეა წულუკიანის განცხადებით, იუსტიციის სამინისტროში შემუშავებული ცვლილებებით საქართველოს სახელმწიფო იღებს ვალდებულებას, პოლიტიკური რეპრესიების მსხვერპლთათვის გასცეს არა დამამცირებელი, არამედ ღირსეული ოდენობის ფულადი კომპენსაცია. იუსტიციის მინისტრის თქმით, შეუძლებელია, რაიმე თანხამ რეპრესირებულ ადამიანებსა და მათ ოჯახებს აუნაზღაუროს ის არაადამიანური ტანჯვა, რაც მათ მიადგათ, მაგრამ სახელმწიფომ უნდა შეცვალოს მანკიერი პრაქტიკა, როდესაც სასამართლოს მიერ პოლიტიკური რეპრესიების მსხვერპლთათვის მიკუთვნებული კომპენსაციის ოდენობა 200-დან 500 ლარამდე მერყეობდა.

როგორც უწყებაში აცხადებენ, მოქმედი კანონმდებლობა არ განსაზღვრავს პოლიტიკური რეპრესიების მსხვერპლთათვის გასაცემი თანხის ოდენობას. იმას, თუ რა თანხა უნდა გაცემულიყო რეპრესირებულზე, სასამართლო წყვეტდა. სასამართლოებში დამკვიდრებული პრაქტიკით, კომპენსაციის ოდენობა 200-იდან 500 ლარამდე მერყეობდა. საქართველოს იუსტიციის სამინისტროს მიერ მომზადებული ცვლილებებით, რეპრესირებულთათვის გასაცემი კომპენსაცია არ შეიძლება 1000 ლარზე ნაკლები იყოს და ის 2000 ლარს არ უნდა აღემატებოდეს. თანხის კონკრეტული ოდენობა კი მათი ასაკის, ჯანმრთელობის მდგომარეობის, რეპრესირებულთა მიმართ განხორციელებული იძულების სხვადასხვა ფორმის სიმძიმითა და სხვა ობიექტური ფაქტორების გათვალისწინებით განისაზღვრება, თუმცა, ის 1000 ლარზე ნაკლები არ იქნება.

კიდევ ერთი ცვლილება, რასაც კანონპროექტი მოიცავს, ისაა, რომ რეპრესირებულებს შესაძლებლობა ექნებათ, თბილისის საქალაქო სასამართლოს გარდა, ქუთაისის სასამართლოსაც მიმართონ. მოქმედი ნორმით, პოლიტიკური რეპრესიების მსხვერპლთა სარჩელებს მხოლოდ თბილისის საქალაქო სასამართლო განიხილავდა, რაც დასავლეთ საქართველოს რაიონებში მცხოვრებთ დამატებით სირთულეებს უქმნიდა. იუსტიციის სამინისტროს მიერ შემუშავებული ცვლილებების შედეგად, რეპრესირებულთა სარჩელების განხილვის უფლება ქუთაისის საქალაქო სასამართლოსაც ექნება.

კანონი საქართველოს იმ მოქალაქეებზე ვრცელდება, რომლებმაც პოლიტიკური რეპრესია განიცადეს ყოფილი საბჭოთა კავშირის ტერიტორიაზე 1921 წლის თებერვლიდან 1990 წლის 28 ოქტომბრამდე და შემდგომ − დამოუკიდებელი საქართველოს ტერიტორიაზე. ეს კანონი არ ვრცელდება 1921 წლის 25 თებერვლიდან 1990 წლის 28 ოქტომბრამდე პერიოდში დეპორტირებულ ეთნიკურ ჯგუფებს მიკუთვნებულ პირებზე, რომელთა რეაბილიტაციის წესი ცალკე განისაზღვრება.