ეკონომიკის ყოფილი მინისტრი კახა ბენდუქიძე ყოფილ პრემიერზე ჩანაწერს აქვეყნებს, სახელმწოდებით „ზღაპრები ბატონ ბიძინაზე“.

„იყო და არა იყო რა, ბატონ ბიძინაზე უკეთესი რა იქნებოდა, იყვნენ ერთი რესპუბლიკელები. რესპუბლიკელები, როგორც ბევრი სხვა, ბატონი ბიძინას კარზე მსახურობდნენ. ბატონ ბიძინას იმდენი ჭკუა... ჭკუა კი არა... იმდენი ქარიზმა... ქარიზმა კი არა, იმდენი შემართება... არც შემართება... ჰო იმდენი ფული ჰქონდა ძნელი იყო არ გემსახურა. ოღონდ ეს რესპუბლიკელები განსაკუთრებული მსახურები იყვნენ, ფეხსაცმელსაც ულოკავდნენ ბატონ ბიძინას, კუდსაც უქიცინებდნენ და თვალებშიც შესციცინებდნენ ოღონდ სულ ამბობდნენ: ჩვენო ფეხსაცმელს რომ ვულოკავთ ყველაზე ჭკვიანური სახით ვულოკავთ, კუდსაც ყველაზე ჭკვიანური სახით ვუქიცინებთ და თვალებში შეციცინებაც ჩვენზე ჭკვიანური სახით არავინ იცისო. კიდევ ერთი ჩვევა ჰქონდათ რესპუბლიკელებს, დადიოდნენ ბატონი ბიძინას მინის სასახლეში და ერთმანეთს გადაუჩურჩულებდნენ ხოლმე ჩვენ ყველაზე ჭკვიანები ვართო, იმდენი უჩურჩულეს რომ ბოლოს თავადვე დაიჯერს თავის სიჭკვიანის ამბავი. ერთხელაც შეარჩიეს რესპუბლიკელებმა თავისი წიაღიდან სიჭკვიანით მეორე კაცი (სინამდვილეში იქ სიჭკვიანით ყველა მეორე იყო, ერთის გარდა, რომელიც მესამე იყო) გამოუშვეს და ჯადოსნური ყუთით ათქმევინეს, აიო ჩვენ რადგან ყველაზე ჭკვიანები ვართ ყველას დაგასწარით და ვამბობთ რომ თითქმის ყველა მაჟორიტარულ უბანზე რესპუბლიკელები იქნებიან კანდიდატები და გვიყარეთ აწი კაკალიო. ეს რომ ბატონმა ბიძინამ შეიტყო დაიბარა რესპუბლიკელები მინის სასახლეში და... არავინ იცის რა უქნა, ერთი კია მას შემდეგ რესპუბლიკელები შეცბუნებული სახით დადიან და ერთთავად ამას გაიძახიან: როგორც ბატონი ბიძინა ბრძანებს ისე იქნება, როგორც ბატონი ბიძინა ბრძანებს ისე იქნებაო“, - წერს ბენდუქიძე.