დაბა კაზრეთის ორ საცხოვრებელ კორპუსში სასმელი წყალი ჯანმრთელობისთვის საშიში აღმოჩნდა. სურსათის ეროვნული სააგენტო მოუწოდებს მოსახლოებას, ონკანიდან წყალს ნუ დალევენ, ვიდრე, „გაერთიანებული წყალმომარაგების კომპანია“ შესაბამის ზომას არ მიიღებს. წყალმომარაგების კომპანიაში კი ეჭვი ეპარებათ, რომ კაზრეთში სასმელი წყალი საშიშია. კომპანია კვლევას დამოუკიდებლად აწარმოებს და მოსახლეობას ზუსტ ინფორმაციას ერთი კვირის შემდეგ მოაწვდის.

"სურსათის ეროვნული სააგენტოს" სურსათის დეპარტამენტის ხელმძღვანელის კახა სოხაძის განცხადებით კი, სასმელი წყლის სახელმწიფო კონტროლს სურსათის ეროვნული სააგენტო ახორციელებს.

სააგენტოს მიერ ჩატარებული ბოლო ლაბორატორიული კვლევის შედეგად დადგინდა, რომ სასმელი წყლის 2 სინჯში პესტიციდების საერთო შემცველობა აღემატება საქართველოს მთავრობის 2014 წლის 15 იანვრის N58 დადგენილებით დამტკიცებულ „სასმელი წყლის ტექნიკური რეგლამენტის“ მოთხოვნებს.

ამდენად სააგენტოს მიერ ჩატარებული კვლევის მიხედვით, წყალი ქიმიური შემადგენლობით პოტენციურ საფრთხეს წარმოადგენს ადამიანის ჯანმრთელობისთვის. შესაბამისად, სურსათის ეროვნული სააგენტო დაბა კაზრეთის N157-ე კორპუსსა და პირველი მიკრორაიონის N97/3-ე კორპუსის მოსახლეობას ურჩევს, არ გამოიყენონ წყალი სასმელად, სანამ „გაერთიანებული წყალმომარაგების კომპანია" შესაბამის ზომებს არ მიიღებს.

„რეზონანსთან“ საუბარში „გაერთიანებული წყალმომარაგების კომპანიის“ ტექნიკური დეპარლამენტის უფროსი ზაზა სიხარულიძე აღნიშნავს, რომ კაზრეთში წყლის კვლევა უკვე დაწყებულია და 1 კვირაში გახდება ცნობილი თუ რამდენად უსაფრთხოა იქ არსებული სასმელი წყალი.

წყარო: გაზეთი "რეზონანსი"