უნდა დავასრულოთ ,,გაგებით მოკიდების“ და შურისძიების პოლიტიკა

პოლიტიკა - 16:41, 04 Sep, 2014

3629

ქვეყანა დანაშაულის და უვიცობის კერად იქცა, სადაც წინსვლას და განვითარებას გასაქანი აღარ აქვს. ტერიტორიებს ვკარგავთ, ჩვენს მოქალაქეებს იტაცებენ და საქონელივით ჰყიდიან, ინვესტორები გარბიან, ეკონომიკა ნადგურდება, დასაქმების ნაცვლად ხალხს დევნიან და უმუშევრობის მაჩვენებელი დღითიდღე იზრდება, სრულყოფილი სამედიცინო მომსახურების მიღება ხალხს არ ძალუძს და პენსია არ გაზრდილა. აღარაფერს ვამბობ გაჩერებულ იუსტიციის სახლებზე და მიჩქმალულ ინფორმაციაზე, დაპირებულ ტექდათვალიერებაზე რაც კორუფციის ახალ წყაროდ იქცევა, ისევე როგორც საბაჟო.

აი, ეს მოაქვს კრიმინალების რევანშს, განუკითხაობას, დევნასა და უვიცობას. დროა დავამთავროთ ბოროტების პოლიტიკა, რომელიც კრემლის ინტერესებს ემსახურება მხოლოდ. დროა შევცვალოთ რეალობა და წერტილი დავუსვათ პუტინის დირექტივების შესრულებას. არ გვაქვს იმის დრო და უფლება ველოდოთ როდის დაიკმაყოფილებს მოთხოვნილებებს რუსი ვაჭრის მოთრეული რამდენიმე გაბოროტებული უვიცი. ყველამ დაინახა თუ რისი მოტანა შეუძლია შურისძიებას და უცოდინრობას. მთავრობის მოწოდებები მხოლოდ შუღლის გაღვივებას ემსახურება და ეს უნდა დავასრულოთ, უნდა დავასრულოთ მოსახლეობის წაკიდების და ერის დახლეჩის, „გაგებით მოკიდების“, კორუფციისა და შურისძიების პოლიტიკა.

ღრმად მწამს, რომ ჩვენი ხალხი ვერ მოეკიდება გაგებით სისხლიან გარჩევებს, ვერ შეეგუება სიღარიბეს, ვერ გახდება მონა რადგან თავისუფლებისთვის საკმარისზე მეტი გაიღო.

უკმაყოფილო ადამიანების რიცხვი იმატებს და არ შეიძლება ქვეყანა რამდენიმე კორუმპირებულ ბოროტმოქმედს მივანდოთ.

გამოსავალი ერთია, გამოვიდეთ და ყველამ ერთად გადავჭრათ პრობლემა.

მუხრან ბურჭულაძე

,,დემოკრატიული განვითარების ეროვნული ცენტრის“ ხელმძღვანელი