გიორგი მღებრიშვილსა და სახალხო დამცველს შორის გაცნობითი ხასიათის შეხვედრა შედგა. შეხვედრის დასრულების შემდეგ სასჯელაღსრულებისა და პრობაციის მინისტრმა პირობა დადო, რომ სახალხო დამცველის აპარატის წარმომადგენლებს საქმიანობის განხორციელება სასჯელაღსრულების ნებისმიერ დაწესებულებაში შეეძლებათ.

„როდესაც მინისტრის პოსტზე მოვედი, ჩემი პირველი განცხადება იყო, რომ მჭიდრო და აქტიური ურთიერთობა მექნებოდა სახალხო დამცველთან და მის აპარატთან, რათა ერთად მოვერიოთ იმ გამოწვევებს, რომლებიც სასჯელაღსრულების სისტემაში ჩვენს წინაშე დგას. პირობას ვდებ, რომ სახალხო დამცველის აპარატის წარმომადგენლებს შეუფერხებლად შეეძლებათ თავიანთი საქმიანობის განხორციელება სასჯელაღსრულების ნებისმიერ დაწესებულებაში", - განაცხადა მინისტრმა.

შევედრის დასრულების შემდეგ კომენტარი სახალხო დამცველმაც გააკეთა. მისი თქმით, შეხვედრაზე საუბარი შეეხო სისტემაში არსებულ ყველა აქტუალურ და პრობლემურ საკითხს.

„შეხვედრაზე იყო გაცნობითი ხასიათის და საუბარი შეეხო ჩვენს რეკომენდაციებს, რომელიც ეხება კონკრეტული პირების მიმართ არსებულ მდგომარეობას, რამდენიმე პატიმართან დაკავშირებით მიმდინარე გამოძიების საკითხს. ვისაუბრეთ ზოგადად უსაფრთხოების საკითხზე. უნდა გაძლიერდეს პატიმართა სიცოცხლის დაცვა და ერთი დაწესებულებიდან მეორეში გადაყვანის პროცესი. საუბარი შეეხო მე-7 დაწესებულებას, რომელში არსებული პირობების გაუმჯობესებასაც ჩვენი ერთ-ერთი რეკომენდაცია ეხება. ასევე, განვიხილეთ ინიციატივები, რომლებიც უკავშირდება მონიტორინგის გაძლიერებას - საუბარია სასჯელაღსრულების დაწესებულებებში ჩვენი წარმომადგენლებისთვის ფოტო და ვიდეოგადაღების დაშვებაზე", - აღნიშნა უჩა ნანუაშვილმა.