„ჭიკაიძე არის მთელი საქართველოს მხრიდან მასხარად აგდებული და თავისი გუნდიც კი არ უფრთხილდება“, - ამის შესახებ საპარლამენტო უმცირესობის წევრმა ირმა ნადირაშვილმა ქვეყანაში უკანასკნელ დღეებში მომხდარი მკვლელობების კომენტირებისას განაცხადა.

როგორც „ერთიანი ნაციონალური მოძრაობის“ ერთერთმა ლიდერმა ჟურნალისტებთან საუბრისას აღნიშნა, საქართველოს მასშტაბით უკანასკნელი დროის მანძილზე ჩადენილი დანაშაულებების სტატისტიკა საგანგაშოა:

„მოკლედ ჩამოვთვლი იმ ფაქტებს, რომელიც გასული კვირის განმავლობაში ქვეყანაში მოხდა, ადიგენში მამაკაცმა სამი ადამიანი გამოასალმა სიცოცხლეს, 22, 24 და 26 წლის ბიჭები, გარდა ამისა, მკვლელობა მოხდა გუშინ ბარნოვზე, ერთმა ამნისტირებულმა მეორე მოკლა, გუშინვე მოკლეს ადამიანი, ეთნიკურად აზერბაიჯანელი ლილოში, რამდენიმე დღის წინ მკვლელობა მოხდა მარნეულის რაიონში, 5 სპეცრაზმელი დაჭრეს ლილოში და მათი ნაწილი ახლაც საავადმყოფოში წევს, პოლიციელები სცემეს მესტიაში, პოლიციის შენობაში. ალბათ ეს სია არის დაუმთავრებელი, მე რომ ამის ჩამოთვლა გავაგრძელო, მაგრამ ვიტყვი ზოგადად, რომ სიტუაცია არის აღმაშფოთებელი“, - განაცხადა ნადირაშვილმა.

მან ასევე აღნიშნა, რომ მომხდარი ფაქტები საყოველთაო ამნისტიის შედეგია, რომელზე პასუხისმგებლობაც ქვეყნის მთავრობამ და პირადად ეკა ბესელიამ უნდა აიღონ:

„სიტუაცია არის ძალიან საშიში და იმ ზღვარზე მისული, როდესაც ადამიანებს გვეშინია, რომ ჩვენი ოჯახის წევრების გარეთ გასვლა შეიძლება დასრულდეს სახიფათოდ. ეს არ არის გასაკვირი და ეს არის შედეგი „ოცნების“ მთავრობის უუნარო პოლიტიკის, ეს არის შედეგი იმისა, რომ წლების განმავლობაში აყალბებენ სტატისტიკას, ყველას უდგენენ ისეთ სურათს, თითქოს ყველაფერი იყოს წესრიგში, სინამდვილეში ჩამოთვლილი ფაქტები სხვა რამეზე მეტყველებს, ეს არის შედეგი იმისა, რომ ივანიშვილმა ხელისუფლებაში მოსასვლელად წინასწარ აიღო ვალდებულებები კრიმინალურ სამყაროსთან და მისცა ქალბატონ ეკა ბესელიას განეხორციელებინა მართლაც უპრეცენდენტო, უპასუხისმგებლო ამნისტია.

დღეს ალბათ, როდესაც ახალგაზრდა პირებს ასალმებენ სიცოცხლეს და ამას აკეთებენ ამნისტირებული ადამიანები, ქალბატონი ეკა ბესელია უმრავლესობასთან ერთად გრძნობს პასუხისმგებლობას და თანამონაწილეობას ამ მკვლელობებში.

ეს არის იმის შედეგი, როდესაც ვიცეპრემიერი თავს უფლებას აძლევს აეროპორტში დახვდეს კანონიერ ქურდებს და გადააცილოს ისინი თურქეთამდე. მანამდე კი მისცეს საშუალება, რომ ისინი იყვნენ საქართველოში და ცხოვრობდნენ“, - აღნიშნა დეპუტატმა.

ნადირაშვილმა „ერთიანი ნაციონალური მოძრაობის“ სახელით ალექსანდრე ჭიკაიძის თანამდებობიდან გადადგომა მოითხოვა:

„ეს არის ძალიან მძიმე სიტუაცია და აუცილებელია ამ სიტუაციის გამოსწორება. მითუმეტეს ყველაფერს ამძიმებს ის, რომ საქართველოს ჰყავს შინაგან საქმეთა მინისტრი, ალექსანდრე ჭიკაიძე, რომელსაც აქვს ერთადერთი ღირსება და დამსახურება, მისი მამა იყო ჰაკიმ ფაშას სიმამრის თამაზაშვილის ნათესავი და მხოლოდ ეს არის მისი ღირსება და დამსახურება.

ის არის არაადეკვატური, ის არის მთელი საქართველოს მხრიდან მასხარად აგდებული და თავისი გუნდიც კი არ უფრთხილდება, ამიტომ „ერთიანი ნაციონალური მოძრაობის“ სახელით ჩვენ მოვითხოვთ, რომ პრემიერმინისტრმა თანამდებობიდან ალექსანდრე ჭიკაიძე გადააყენოს“, - განაცხადა ნადირაშვილმა.

უკანასკნელი ოთხი დღის განმავლობაში მომხდარი მკვლელობები:

28 აგვისტო - ადიგენის რაიონში მამაკაცმა 3 ახალგაზრდა სანადირო თოფით ჩაცხრილა, მეოთხე კი მძიმედ დაიჭრა. დამნაშავემ დანაშაული აღიარა, საქმეზე გამოძიება განზრახ მკვლელობის მუხლით მიმდინარეობს.

30 აგვისტო თბილისში დიჯეი და რეჟისორო დაჩი დარჩია მოკლეს, დამნაშავე დაკავებულია, მას სასამართლომ აღკვეთის ღონისძიების სახით ორთვიანი წინასწარი პატიმრობა შეუფარდა, გამოძიება განზრახ მკვლელობის მუხლით მიმდინარეობს.

2 სექტემბერი - თბილისში, ვაკეში, ბარნოვის ქუჩაზე ლაშა მახარაძე ქუჩაში ჩაცხრილეს. საქმეზე გამოძიება განზრახ მკვლელობის მუხლით მიმდინარეობს

2 სექტემბერი - თბილისში, ლილოს დასახლებაში ერთერთ რესტორანში ეთნიკური აზერბაიჯანელი მოკლეს, საქმეზე გამოძიება განზრახ მკვლელობის მუხლით მიმდინარეობს.