თბილისის მერის დავით ნარმანიას ხელმძღვანელობით ამ წუთებში დედაქალაქის მთავრობის სხდომა მიმდინარეობს. სხდომაზე სულ შვიდი საკითხი იქნება განხილული მათ შორის არის სპეციალური კომისიის შექმნა, რომელიც სხვადასხვა ორგანიზაციების მხრიდან მერიის მიმართ არსებულ დავალიანებებს შეისწავლის. კომისია ასევე შეისწავლის თუ რა რაოდენობის დავალიანება აქვს მერიას სხვადასხვა ორგანიზაციების მიმართ. როგორც მერის მოადგილემ განაცხადა, აღნიშნული საკითხის ირგვლივ გარკვეული ბუნდოვანება არსებობს და კომისია ყველა კითხვას პასუხს გასცემს.

„კომისიის მიერ შესწავლილი უნდა იქნას ის საკითხები, რომელიც დაკავშირებულია მერიაში და შპს-ბში არსებულ დავალიანებებთან. ეს არის ძალიან მნიშვნელოვანი, რადგან ამ სფეროში აბსოლუტური ბურუსია და ვფიქრობ, რომ ეს კომისია იმუშავებს ინტენსიურად და დაიდება სერიოზული შედეგები“, - განაცხადა მერის მოადგილემ გიორგი ხელაიამ.

დედაქალაქის მთავრობის სხდომაზე განხილული იქნება, ასევე საკრებულოს მიერ მერიის დამტკიცებული მოთხოვნა, რომლის მიხედვით მერიამ უნდა აიღოს გარკვეული რაოდენობის სესხი 2014 წლის ბიუჯეტში ცვლილებებთან დაკავშირებით.