ხვალიდან ქვეყანაში საკანონმდებლო ორგანოს ორი შენობა იმუშავებს, თუმცა პარლამენტის ძველ შენობაში პრეზიდენტ გიორგი მარგველაშვილს კაბინეტის გაყოფა პრემიერმინისტრთან მოუწევს.

პარლამენტის თავმჯდომარის დავით უსუფაშვილის განცხადებით, შენობის B-ფლიგელის სრული რეკონსტრუქციაა დაგეგმილი, რომელიც პრეზიდენტის ინიციატივით, მაღალი რანგის სტუმრების მისაღებად იქნება გამოყენებული. მისივე განცხადებით შენობაში კვლავ ექნებათ სამუშაო ოთახები პარლამენტის წევრებს.

„მოხდება ამ სართულის რეკონსტრუქცია ისე, რომ იქნება სათანადო ადგილი, როცა პრეზიდენტი მობრძანდება, უზრუნველყოფილი იყოს მისი მუშაობა, როცა პრემიერი მობრძანდება უზრუნველყოფილი იყოს მისი მუშაობისთვის.

რაც ყველაზე მნიშვნელოვანია, პარლამენტის წევრებს, ვისაც ამის სურვილი ექნება და გამოთქვეს სურვილი, მათ ექნებათ სამუშაო ადგილი ამ შენობაშიც. იმიტომ რომ ეს შენობა არის პარლამენტის ბალანსზე და ჩვენ გვაქვს საშუალება პარლამენტის წევრებს მივცეთ იმისი "ფუფუნება", რომ დედაქალაქშიც იშრომონ ხოლმე, თქვენ შეგხვდნენ და სხვასაც",-განაცხადა უსუფაშვილმა.