„რუსთავი 2“-ის დამფუძვნებლის ეროსი კიწმარიშვილის საქმეზე მიმდინარე კვირას ბოლო ორი ექსპერტიზა ჩატარდება. როგორც „ნიუპოსტს“ ზურა კიწმარიშვილმა განუცხადა, ეს ექსპერტიზები „ერთი გასაღების ფუნქციას შეასრულებს“ და იმედოვნებს, რომ საქმეში სწორედ იქნება გამოყენებული.

„ბოლო ორი ექსპერტიზა ჩანიშნული ამ კვირაში. ერთი ექსპერტიზა ჩანიშნული ჰქონდა გამოძიებას, რომელიც ტრაექტორიას უკავშირდება და რომელსაც ჩვენ დავესწრებით. მეორე ჩვენი ინიციატივით ვთხოვეთ გამოძიებას. ეს ექსპერტიზა არის იმ ტიპის, რომელიც ცოტა ხნის წინ შემთხვევის ადგილზე შსს-მ ჩაატარა. თუმცა ამ შემთხვევაში ექსპერტიზა მანქანის სივრცეში ჩატარდება. ამასაც ჩაატარებს პროკურატურა და ამ ექსპერტიზასაც დავესწრებით. ამით ყველა ექსპერტიზა, რომელიც ნივთმტკიცებებს, საგნებს, მანქანას, იარაღს და გარდაცვალებას უკავშირდებოდა, გაკეთდა.

ეს ექსპერტიზები ერთი გასაღების ფუნქციას იძნენს და ეს ყველაფერი მთლიანობაში სწორედ უნდა იქნეს გამოყენებული“, - განაცხადა ზურა კიწმარიშვილმა.

მისი თქმით, ეს იყო დანაშაული და არ დაუშვებს, რომ „ყველაფერი უკვალოდ წაიშალოს“.

„სამწუხაროდ, გამოძიების პროცესში არ გვაქვს საშუალება, თუნდაც ჩვენი ცნობისმოყვარეობა დავიკმაყოფილოთ და გამოვკითხოთ გამოძიებას, ხომ არ იყო ვინმეს ჩვენება მნიშვნელოვანი და ასე შემდეგ. ყველაფერს ველოდები იქიდან გამომდინარე, რომ გვაქვს მტკიცე რწმენა, რომ ეს იყო დანაშაული. პირადად მე, როდესაც რაღაცეებს ვაანალიზებ და ჩნდება კითხვა, თუ რატომ არ ჩანს ესე ნათლად დანაშაულის ნიშნები, ვუშვებ, რომ ეს არის საკმაოდ მაღალ დონეზე ჩატარებული დანაშაული. თუმცა ნამდვილად ვერ დაუშვებ, რომ ყველაფერი უკვალოდ წაიშალოს. რაღაც კვალი მაინც უნდა არსებობდეს, რასაც პროფესიონალმა გამოძიებამ ფარდა უნდა ახადოს. შესაძლოა კვალიფიკაციის შეცვლა მოხდეს. მაგალითად, შეიძლება შეკვეთილ მკვლელობად გადაკვალიფიცირდეს. რაც შეეხება დროს, თუ როდის დაიდება საბოლოო დასკვნა, ამას ვერ გეტყვით. როგორც კი გაირკვევა ყველაფერი, პროკურატურა ამას გაასაჯაროებს“, - განაცხადა ზურაბ კიწმარიშვილმა.

ნინო დათაშვილი