საქართველოს პრეზიდენტის გიორგი მარგველაშვილის ვიზიტი ამერიკის შეერთებულ შტატებში შესაძლოა გაუქმდეს. გავრცელებული ინფორმაციის თანახმად გაერო-ს მიერ ორგანიზებულ სამიტს კლიმატის ცვლილებების საკითხზე პრეზიდენტის ნაცვლად პრემიერმინისტრი ირაკლი ღარიბაშვილი დაესწრება.

ნიუ იორკში დაგეგმილი ვიზიტების შესახებ დღეს განცხადება საგარეო საქმეთა მინისტრის მოადგილემ დავით ზალკალიანმა გააკეთა. მან დაადასტურა, რომ ყველა ფორუმზე მონაწილეობას ირაკლი ღარიბაშვილი მიიღებს.

„უკვე დადასტურებულია, რომ 22 სექტემბერს საქართველოს პრემიერმინისტრის სიტყვით გამოვა გაერო-ს გენერალური ასამბლეის სპეციალურ სამიტზე, 23 სექტემბერს კი კლიმატის საკითხზე. 23 სექტემბერს საქართველოს პრემიერმინისტრი მეუღლესთან ერთად მიწვეულია გაერო-ს ასამბლეის 29-ე სესიისადმი მიძღვნილ საზეიმო ღონისძიებაზე“, - განაცხადა ზალკალიანმა.