მას შემდეგ, რაც ბიძინა ივანიშვილმა პრემიერ-მინისტრის პოსტი დატოვა, ურეკში მყარად გადასახლდა და ათასნაირი ობიექტების მშენებლობას მიჰყო ხელი. როგორც ადგილობრივები გაზეთ „ქრონიკა“-სთან საუბრისას აცხადებენ, მიწის ფასმა ისე მოიმატა, ურეკსა და შეკვეთილში სადაც კი ნაგავსაყრელი თუ მიგდებული ბუჩქნარი იყო, მოსახლეობამ ყველგან გაწმინდა.

„ურეკიდან დაწყებული, შეკვეთილის ჩათვლით, ზღვის სანაპირო ზოლზე საკონცერტო დარბაზისა და სასტუმროს გარდა, ბიძინა ივანიშვილმა დაიწყო ახალი დასასვენებელი პარკის მშენებლობა, რომელსაც „შვიდფერა“ დაერქმევა და ამდენივე ფერში იქნება განათებული“, - ამბობენ ადგილობრივები.

როგორც „ქრონიკასთან“ საუბარში ადგილობრივი მცხოვრები ეკა ალექსაია ამბობს, ასევე შენდება აკვაპარკი და სანაპირო ზოლზე გაიშლება სპეციალურად უცხოეთიდან ჩამოტანილი ქვიშა:

„ჩვენ უკვე ვეღარ გავიგეთ ბიძინა ივანიშვილი იმერელია თუ გურული, აქ ისეთ რაღაცეებს აკეთებს, მალე ბათუმი მესამეხარისხოვანი ქალაქი გახდება“, - ამბობს ეკა ალექსაია.