თეა წულუკიანს ქურდულ სამყაროსთან კავშირში ადანაშაულებენ

პოლიტიკა - 11:25, 01 Sep, 2014

4017

ბათუ საღინაძე ყოფილი პოლიტპატიმარია. მან 2010 წელს ევროსასამართოში საქართველოს ხელისუფლებას საქმე მოუგო. ევროსასამართლომ საქართველოს ხელისუფლებას საღინაძისათვის 90 ათას ევროდ ღირებული საცხოვრებელი სახლის, ან იმ კოტეჯის გადაცემა დააკისრა, საიდანაც საღინაძე 2005 წელს უკანონოდ, შს სპეციალური დანიშნულების რაზმის მეშვეობით, შს ექსმინისტრს ირაკლი ოქრუაშვილის ბრძანებით, ყოველგვარი საფუძვლის, სასამართლოს გადაწყვეტილების და განჩინების გარეშე, ოქრუაშვილთან პიროვნული დაპირისპირების ნიადაგზე გამოასახლეს.

ევროსასამართლომ ხელისუფლებას, ასევე დააკისრა საღინაძისათვის მორალური ზიანის ანაზღაურება 15 ათასი ევროს ოდენობით, რაც აღსრულდა, ხოლო კუთვნილი კოტეჯის დაბუნებას საღინაძე დღესაც ცდილობს. მისი თქმით, საკუთარი ქონების დაბრუნებაში, უშუალოდ თეა წულუკიანი უშლის ხელს, ვინაიდან მინისტრს ასეთი დავალება აქვს მიღებული.

აღსანიშნავია, რომ ბათუ საღინაძეს წინა ხელუსუფლებამ ლევან კალაძის საქმის გამოძიება ანდო, შემდეგ კი როცა გატაცების საქმის ძიებისას ხელისუფლების მღალჩინოსნებზე „გავიდა“, შინაგან საქმეთა სამინისტროში მისი ყოფნა და ძიებაში მონაწილეობა ზოგიერთ მაღალჩინოსანს ხელს აღარ აძლევდა, რის გამოც ის ჯერ სამსახურიდან დაითხოვეს, ხოლო მოგვიანებით კუთვნილი კოტეჯიდან გამოსახლეს, ბოლოს კი დააპატიმრეს. პოლიტპატიმრად ის ამჟამინდელმა ხელისუფლებამ ცნო.

ბათუ საღნაძეს გაზეთი „კვირის ქრონიკა“ ესაუბრა:

რამდენიმე დღის წინ კვლევები გამოქვეყნდა. წულუკიანი მაღალრეიტინგულთა სიაშია. უბედურებაა, რომ ის ვიღაცას მაღალრეიტინგული ჰგონია! არაფერი რეიტინგი მას არ აქვს იმ ხალხის თვალში, ვისთანაც მას საქმიანი შეხება ჰქონია! ეს არის ბუნებით უსამართლო ქალი, რომელიც იაფფასიან პიარზე მუშაობს.

ის იურისტი არ არის, სამაგიეროდ თავხედია წულუკიანი! ჩემს საქმესთან დაკავშირებით მას თავიდან სწორი პოზიცია ჰქონდა. პრესის საშუალებით განაცხადა, რომ ჩემს მიმართ უკანონობა იყო ჩადენილი შემდეგ „ჩაიკეტა“ და აღარ პასუხობს არაფერზე. უკანონობას სჩადის ეს ქალი პირდაპირ!

- რას უკავშირებთ მის „ჩაკეტვას“?

- სერიოზული ძალები ჩაერივნენ და იმათ უსმენს. ამ ქალმა ყველაფერი იკადრა. გაკვირვებული ვარ.

- რომელ ძალებს გულისხმობთ?

- არ გამოვრიცხავ ჩემთან დაპირისპირებული დამნაშავეთა ელიტა (ქურდული სამყარო) ჩარეულიყო.

- ვის გულისხმობთ კონკრეტულად?

თუნდაც ტარიელ ონიანს, რომელიც იმ გატაცებებსა და მკვლელობაში იყო ჩარეული. პირადად მინისტრი თეა წულუკიანი უშლის ხელს ჩემი საქმის აღსრულებას! მე შევხდი პარლამენტის თავმჯდომარეს, დავით უსუფაშვილს და გადაწყვეტილი იყო, რომ ევროსასამართლოს გადაწყვეტილება აღსრულებულიყო. საბუთები, რომლებიც უსუფაშვილს წარვუდგინე, მას წულუკიანს გადაუგზავნა რეაგირებისთვის, მაგრამ ის რეაგირებას არ ახდენს! არნახულ უკანონობას სჩადის!

- რას აპირებთ?

_მე მივმართავ ევროსასამართლოს, უკვე როგორც პოლიტპატიმარი, რიგში ვერ ჩამაყენებენ, როგორც ადრე ჩამაყენეს. ევროსასამართლო ვალდებულია, ამ საქმეს დაუბრუნდეს. მაშინ ვნახოთ, როგორ შეაფასებენ წულუკიანის მუშაობას. რაც ქვეყნისათვის დიდი სირცხვილი იქნება.