ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის ალექსი პეტრიაშვილის განცხადებით, დღეიდან საქართველოდან ევროკავშირის ბაზარზე, პროდუქციის შეტანა დამატებითი გადასახადის გარეშეა შესაძლებელი.

„დღეიდან ოფიციალურად, ფორმალურად შესაძლებელია ევროკავშირის 500 მილიონიან ბაზარზე ყოველგავრი დამატებითი გადასახადის გარეშე საქართველოდან პროდუქციის შეტანა. ეს არის უმნიშვნელოვანესი, ჩვენ ყველაფერს ვაკეთებთ, რომ ჩვენმა მეწარმეებმა, მწარმოებლებმა უმოკლეს დროში შეძლონ სტანდარტების შესაბამის დონემდე მიყვანა ის ვისაც ეს სჭირდება“,- განაცხადა პეტრიაშვილმა.

შეგახსენებთ, რომ დღეიდან ევროკავშირთან ასოცირების შეთანხმების უდიდესი ნაწილი ამოქმედდა. კერძოდ, ძალაში შევიდა დოკუმენტის 80%, მათ შორის, ღრმა და ყოვლისმომცველი თავისუფალი ვაჭრობის სივრცის კომპონენტი.

აღნიშნული ითვალისწინებს ქართული სასოფლო-სამეურნეო და ინდუსტრიული პროდუქციის თავისუფალ განთავსებას ევროკავშირის ბაზარზე და ასევე, ადგილობრივ ბაზარზე.

ნინა შადური