უელსის სამიტის შემდეგ ამერიკის შეერთებული შტატების თავდაცვის მდივანი საქართველოს ეწვევა. პენტაგონის ხელმძღვანელის რანგში ეს ჩაკ ჰეიგელის საქართველოში პირველი ვიზიტი იქნება.

ვიზიტის დეტალები ჟურნალისტებს აშშ-ს თავდაცვის უწყების პრესსპიკერმა გააცნო. ჯონ კირბის ცნობით საქართველო შეერთებული შტატებისა და ნატო-ს ერთერთი მნიშვნელოვანი და ძლიერი შესაძლებლობების მქონე პარტნიორია.

თბილისში დაგეგმილი შეხვედრების დროს ჩაკ ჰეიგელის განხილვის ერთერთი მთავარი თემა უკრაინაში შექმნილი ვითარება იქნება. საქართველოდან კი თავდაცვის მდივანი თურქეთში გაემგზავრება.

„ეს იქნება თავდაცვის მდივნის რანგში პირველი ვიზიტი საქართველოში. თუმცა, ჩაკ ჰეიგელი მანამდეც შეხვდა თავის ქართველ კოლეგას. ის ასევე შეხვდა საქართველოს პრემიერმინისტრს, წლის დასაწყისში მიუნჰენში ყოფნის დროს. საქართველო როგორც ერაყში ასევე ავღანეთში შეერთბული შტატების ღირებული პარტნიორია. თავდაცვის მდივანს დიდი სურვილი აქვს ქართველ ხალხს მათ მიერ შეტანილი წვლილისა და გაღებული მსხვერპლის გამო მადლობა გადაუხადოს“, - განაცხადა კირბიმ.