საქართველოს ფინანსთა მინისტრმა ნოდარ ხადურმა და საქართველოს შრომის, ჯანმრთელობისა და სოციალური დაცვის მინისტრის მოადგილემ მარიამ ჯაშმა ბრიფინგი გამართეს და საზოგადოებას ფინანსთა სამინისტროს მიერ მომზადებული ახალი საკანონმდებლო ინიციატივა გააცნეს, რომელიც „საქართველოს სოლიდარობის ფონდის“ და მისი ბენეფიციარების მხარდაჭერას ითვალისწინებს.

„მნიშვნელოვნად მიგვაჩნია, საზოგადოებას მივაწოდოთ ინფორმაცია, რაში დაიხარჯება მათ მიერ „საქართველოს სოლიდარობის ფონდში“ ქველმოქმედებისთვის გადარიცხული თანხები. ჩვენ ვმუშაობთ, რათა ზოგადად, მოვაწესრიგოთ ჰუმანიტარული დახმარების მიმღები პირების დაბეგვრის სისტემა და შემუშავდეს უნიფიცირებული მეთოდოლოგია. რაც შეეხება ამჟამად შემუშავებულ საკანონმდებლო ინიციატივას - ცვლილება ეხება სახელმწიფოს მიერ დაარსებული არასამეწარმეო (არაკომერციული) იურიდიული პირების საქველმოქმედო საქმიანობას,“ - განაცხადა ნოდარ ხადურმა.

„ფონდის სახელით მსურს მადლიერება გამოვხატო ფინანსთა სამინისტროს თანამშრომელთა მიმართ, რომლებმაც უკვე განაცხადეს თანხმობა ფონდში ყოველთვიური შენატანების შესახებ. განსაკუთრებით მინდა აღვნიშნო ის მხარდაჭერა, რომელსაც ფინანსთა სამინისტრო გვიწევს. საგადასახადო კანონმდებლობაში აღნიშნული ცვლილება მნიშვნელოვანი დახმარება იქნება ფონდისთვის როგორც ფინანსური რესურსების მობილიზების კუთხით, ისე საზოგადოების გააქტიურების მიმართულებით,“ - განაცხადა სმარიამ ჯაშმა.

ნინა შადური